Олунньу 11 күнүгэр П.Ойуунускай аатынан Саха тыйаатырын салонугар “Туой Хайа ахтылҕана” диэн поэтическай дьүһүйүү буолла.
Бу күн Саха тыйаатырын араас көлүөнэ артыыстара бэйиэт, тылбаасчыт, СӨ Суруйааччыларын сойууһун чилиэнэ, СӨ үтүөлээх юриһа, РФ суутун систиэмэтин бочуоттаах үлэһитэ Михаил Иванов-Чуона Мэхээлэ хоһооннорун аахтылар.
Тэрээһини СӨ норуодунай артыыската Зоя Багынанова иилээн-саҕалаан ыытта. Бу тэрээһин сыалынан-соругунан суруйааччылар айымньыларын дьүһүйүү оҥорон, литературнай салоҥҥа хоһооннору дорҕоонноохтук ааҕыы буолар. Үтүө саҕалааһын бастакы күнэ өрө көтөҕүллүүлээхтик арылынна.
Ааптар Чуона Мэхээлэ Туой Хайа олохтоохторун иэдээнин хоһооҥҥо хоһуйбутун тыйаатыр араас көлүөнэ артыыстара Зоя Багынанова, Прасковья Адамова, Зоя Попова, Маргарита Борисова, Надежда Ушницкая, Елизавета Потапова, Айаал Аммосов уо.д.а. киһи эрэ уйадыйыах аахтылар. Чуона Мэхээлэ хоһоонунан айымньыларын истээри, литературнай салону толору хоһоону сэҥээрээччилэр, ааптар биир идэлээхтэрэ, суруйааччылар кэллилэр.
Биир чаастаах дьүһүйүү кэнниттэн: «Аны да үтүмэн үтүө айымньылар артыыстар көмөлөрүнэн ааҕааччыга тиийэ турдуннар», – диэн баҕа санааларын ытыс тыаһынан тириэртилэр.
Василий Гоголев-Уйулҕан, СӨ Суруйааччыларын сойууһун чилиэнэ:
«Ойуунускай аатынан Саха академическай тыйаатырын артыыстара бэйиэт хоһооннорунан дьикти дьүһүйүүлэрин олус истиҥник, иһирэхтик, долгутуулаахтык толорбуттарын харааста да, сэргии да көрдүм. Дэлэҕэ даҕаны, Чуона Мэхээлэ бэйэтэ сөҕөн-махтайан: «Ама, мин хоһооннорум дуо?» – диэ дуо! Аттыбар олорбут Туой Хайа олохтоохторо, кырдьаҕастар харахтарын уутун сотто, сүрэхтэригэр ыттара, ааспыт аймалҕаннаах ыар күннэри саныы олороохтоотулар. Кинилэр Чуона Мэхээлэ төрөөбүт ийэ дойдуларын сүтэрэн, тулаайах оҕолор курдук сылдьар дьонун түмэн, дойдуларын ахтылҕанын таһаарбытыгар махталларын эттилэр.
Ону көрөн, тус бэйэм киэн тутта санаатым».
Айгыына ИВАНОВА, «Саха сирэ» хаһыат, edersaas.ru сайтка анаан.