Чурапчы бааһынайдарыттан бастакынан «Комплекс» хаһаайыстыба аныгы улахан хотоннонно
Чурапчы бааһынайдарыттан бастакынан Одьулуун нэһилиэгэр туруктаахтык үлэлии олорор, элбэх сүөһүлээх Михаил Михайлов “Комплекс” бааһынай хаһаайыстыбатыгар аныгы технологиянан саҥа улахан хотон тутулунна. Тыа хаһаайыстыбатын уонна ас-үөл бэлиитикэтин министиэристибэтин былааныгар киирэн, манна биир сайын иһигэр 120 ыанньык турар үүт блоктаах комплекс дьэндэйдэ.
Чыккымай үөрүн ортотугар куба кыыл кэлэн түспүтүнүү, мааны бэйэлээх улахан тутуу кылбас гыммытыттан нэһилиэк олохтоохторо соһуйан эрэ хааллылар. Тутуу үлэтин Семен Иванов салайааччылаах “Уус” ХЭУо тутуу хампаанньата бэдэрээттэһэн толордо. Отучча киһи үлэлээтэ. Кинилэр бэс ыйыгар саҕалаан баран, барытын ситэрэн-хоторон, икки аҥаар ыйынан үлэҕэ туттардылар.
Иллэрээ күн саҥа эбийиэги үлэҕэ киллэрии үөрүүлээх түгэнигэр министиэристибэттэн тутуу үлэтин хонтуруоллуур боломуочуйалаах “Туймаада” хампаанньа генеральнай дириэктэрэ Александр Васильев, улуустары кытта үлэҕэ эппиэттээх Олег Марков уонна хампаанньа тутууга салаатын начаалынньыга Анатолий Соломонов, салаа технадзорга исписэлииһэ Александр Васильев кыттыыны ыллылар. Улуус өттүттэн баһылык Андрей Ноговицын тыа хаһаайыстыбатын управлениетын уонна нэһилиэк салайааччыларын кытта сырытта.
Санатан эттэххэ, маннык бырайыагынан икки хотонноох толору комплексы өрөспүүбүлүкэ бааһынайдарыттан бастакынан Горнай Ааһыматыгар “Сир” бааһынай хаһаайыстыба баһылыга Петр Данилов туттаран турар. Онон, Одьулууҥҥа иккиһинэн тутулунна. Урукку сылларга тутуу ороскуота үксэ хаһаайыстыбаларга «туттарбыт буруйдарыгар» бэйэлэригэр ыйанан хаалар эбит буоллаҕына, өйөбүл быйылгыттан тубуста уонна судургутуйда: 80 бырыһыана өрөспүүбүлүкэ бүддьүөтүттэн тута толуйуллар, 20 бырыһыанын улуус уонна хаһаайыстыба аҥаардаһан төлүүллэр, тиийбэт сууматын “Туймаада” хампаанньа баантан кирэдьиит ылан, хаһаайыстыбаҕа иэс биэрэр.
Холобур, бу “Комплекс” хаһаайыстыба хотоно 39 мөл. солк. суумалаах тутуу. “Хаарыаны, маннык табыгастаах схеманан өссө туттарбыт киһи бэрт да буолуох этэ…” – диэн бааһынай хамсааһыныгар маҥнайгынан туруммут уонна билигин дэлби бытарыйан олорор хаһаайыстыбалардаах улуус баһылыга төбөтүн сынньа хаалла. Маныаха уопут баар: Үөһээ Бүлүү Ороһутугар нэһилиэк баһылыга Анатолий Антонов үс бааһынай сүөһүлэрин кыттыһыннаран, былырыын “Туймаада хотонун” туттарбыта. Дьиҥнээх кэпэрээссийэ диэн, дьэ ити буоллаҕа.
Василий НИКИФОРОВ, «Саха сирэ» хаһыат, edersaas.ru
Хаартыскаҕа (хаҥастан уҥа): «Уус» ХЭУо дириэктэрэ Семен Иванов, Одьулуун нэһилиэгин баһылыга Людмила Ефремова, «Туймаада» ҮХАПК генеральнай дириэктэрэ Александр Васильев, Чурапчы улууһун баһылыга Андрей Ноговицын уонна «Комплекс» бааһынай хаһаайыстыба баһылыгын солбуйааччы Иван Парфенов илии тутустулар.