“Дохсун” спортивнай комплекска 2000-2001 сс. төрөөбүт уолаттарга көҥүл тустууга Н.Н.Тарскай бирииһигэр өрөспүүбүлүкэҕэ биирдиилээн уонна хамаанданан бастыыр иһин күрэхтэһии ыытылынна. Күрэхтэһиигэ барыта 15 хамаандаттан 250 эдэр бөҕөс күөн көрүстэ.
Хапсыһыылар түмүгүнэн Дьокуускай куорат “Киин” уокуруга (баһылык М.Гасанбалаев) олохтообут сыаналаах анал бирииһинэн 120 киилэҕэ бастаабыт Никита Хабаров наҕараадаланна. Оттон “Строительнай” уокурук (баһылык В.Сорочан) анал бирииһэ 54 киилэҕэ иккис миэстэлэммит Эльшад Агаевка туттарылынна.
ТҮМҮК
Икки күннээх күрэхтэһии түмүгүнэн бэйэлэрин ыйааһыннарыгар бастаатылар:
42 кг – Петя Ероглазов,
46 кг – Олег Фомин,
50 кг – Петя Егоров (үһүөн чурапчылар),
54 кг – Вася Яковлев (Мэҥэ Хаҥалас),
58 кг – Андриан Ленскэй,
63 кг – Никита Софронов (иккиэн Чурапчыттан),
69 кг – Артем Аммосов (Уус Алдан),
76 кг – Максим Любянецкай (Амма),
85 кг – Ваня Алексеев (Бүлүү),
100 кг – Рома Нестеров (Амма),
120 кг – Никита Хабаров (Дьокуускай).
ХАМААНДАНАН ТҮМҮК
Хамаанданан түмүккэ бастакы миэстэни 152 очукуолаах Чурапчы (тренер Юрий Афанасьев), иккиһи 139 очукуолаах Дьокуускай (тренер Владислав Андреев), үсүһү 134 очукуолаах Уус Алдан (тренер Иван Пантилов) ыллылар.
Күрэхтэһии түмүгүн туһунан билиһиннэрэригэр кылаабынай судьуйа Станислав Афанасьевтан көрдөстүбүт.
-Биирдиилээн үчүгэй уолаттар бааллар. Холобур, 100 киилэҕэ кыайбыт Амма бөҕөһө Рома Нестеров “кочерга”, “миэлиҥсэ” курдук уустук албастары сатабыллаахтык туттан, балайда күүстээх утарсааччыларын ыраастык кыайталаата. 46 киилэҕэ иккис буолбут Уус Алдаҥҥа спорт маастара Семен Петухов салалтатынан дьарыктанар Ваня Степанов эмиэ үчүгэй тустууну көрдөрдө.
Күрэхтэһиибит сыала-соруга диэн, кулун тутар 4-5 күннэригэр Благовещенскайга буолар Уһук Илин Федеральнай уокурук чөмпүйэнээтин иннинэ Саха сирин хамаандатын сүүмэрдээһин. Онно бастаабыттар Россия үөрэнээччилэргэ спартакиадатыгар уонна салгыы Россия уолаттарга күрэхтэһиитигэр кыттыахтара.
Петр ПАВЛОВ, “Саха сирэ”, //edersaas.ru
Хаартыскаҕа: күрэхтэһии кылаабынай судьуйата Станислав Афанасьев 120 киилэ бастыҥнарын наҕараадалаата.