Тыа хаһаайыстыбатын пресс-сулууспата иһитиннэрэринэн, тыа хаһаайыстыбатын миниистирин э.т. Александр Атласов солбуйааччыта Виктор Павловтыын уонна сири оҥорууга, мелиорацияҕа, материальнай-техническэй хааччыйыыга департамент сүрүн исписэлииһэ Иннокентий Мяринниин Чурапчы улууһугар сылдьан, улуус дьаһалтатыгар салайааччылары, исписэлиистэри уонна бааһынай хаһаайыстыбалар баһылыктарын түмэн, оттооһун тэрээһинин билистилэр.
Чурапчы улууһунааҕы тыа хаһаайыстыбатын управлениетын салайааччыта Анна Захарова улуус быйыл сайын 42293 туонна оту кэбиһэр, 2150 туонна сиилэһи угар, 200 туонна сенаһы суулуур былааннааҕын иһитиннэрдэ. Чурапчылар сааскы ыһыы үлэтин былаанын сүүс бырыһыан толорбуттар. Нэһилиэктэр баһылыктара быйыл отчуттар ходуһаҕа урукку сыллардааҕар эрдэ киирбиттэрин, от үүнүүтэ орто үчүгэйин билиһиннэрдилэр. Ол курдук, “абааһылар мунньахтарын” кэтэспэккэ, от ыйын бастакы күннэриттэн 12 звено от үлэтин саҕалаабыт. Сорох хаһаайыстыбалар салайааччылара атыыга оттуурга бэлэмнэрин, онуоха мобильнай биригээдэлэри уматыгынан хааччыйыыга көмө оҥоһулларыгар баҕа санааларын этиннилэр. Түмүккэ миниистир э.т. Александр Атласов ситиһиилээх үлэни баҕаран туран, отчут-масчыт дьонноох Чурапчы улууһа былааннаах отун бэлэмнииригэр эрэнэрин биллэрдэ.
Василий НИКИФОРОВ, «Саха сирэ» хаһыат, edersaas.ru