Чурапчылар, аммалар – инники күөҥҥэ

Ааптар: 
Бөлөххө киир:

Олунньу 15-18 күннэригэр “Кыайыы 50 сыла” Спорт дыбарыаһыгар ыытыллыбыт өрөспүүбүлүкэ волейболга бастакы лигатын чөмпүйэнээтигэр эр дьоҥҥо чурапчылар, дьахталларга аммалар тэҥнээхтэрин булбатылар.

edersaas.ru


 Дьахталларга кыайыылааҕы быһаарар түмүк оонньууга Амма уонна Миирнэй хамаандалара көрүстүлэр. Ол эрээри, көрөөччүлэр көһүппүттэрин курдук, интэриэһинэй, киһини тардар киирсии буолбата. Аммалар быйыл даҕаны утарылаһааччыларыттан төбө үрдүк буолалларын итэҕэттилэр. Миирнэйдэр икки бастакы түһүмэххэ эрэ утарсан көрдүлэр — 25:20, 25:22. Үһүскэ оонньуулара олох да ыһыллан хаалла — 25:13. Онон Амма волейболистара үһүс сылларын өрөспүүбүлүкэ чөмпүйүөннэринэн буоллулар. Дьокуускай куорат хамаандата боруонса мэтээлинэн наҕараадаланна.

Миэстэлэспит улуустары сэргэ Өлүөхүмэ, Үөһээ Бүлүү, Сунтаар сүүмэрдэммит хамаандалара Саха сирин норуоттарын VII Спортивнай оонньууларыгар кыттар быраабы ыллылар.

Эр дьоҥҥо эмиэ сэттэ хамаанда күрэс былдьаспытыттан, быйылгы чөмпүйэнээккэ чурапчылар күннэрэ таҕыста, чыычаахтара ыллаата. Нам күүстээх хамаандатын кытта бастакы оонньууларыгар Альберт Бродников капитаннаах чурапчылар икки түһүмэххэ хотторон баран, үһүс быһаарыылаах баартыйаҕа ураты дьулуурдарынан, тулуурдарынан хотуулаах таҕыстылар уонна кэлин тиһэҕэр көрсүһүүнү бэйэлэрин туһаларыгар түмүктүүрү ситистилэр. Чөмпүйэнээт бүтэһик күнүгэр ленскэйдэри өрө тыыннарбатылар — 25:17, 25:15, 25:15 ахсаанынан баһыйа тутан, үһүс миэстэҕэ үтүрүйдүлэр. Итиэннэ тэҥ очукуолаах Нам волейболистарын сирэй көрсүһүүгэ кыайбыттарынан, чурапчылар өрөспүүбүлүкэ бастыҥ хамаандатын аатын сүктүлэр. Кинилэр иннилэринэ тыа сирин волейболистара маннык улахан ситиһиилэнэ иликтэрэ. Урукку сылларга кыайыылааҕы Нерюнгри, Алдан, Миирнэй, Дьокуускай уонна университет хамаандалара бэйэлэрин икки ардыларыгар быһаарсар буолаллара.

Кыайыылаахтары сэргэ Миирнэй, Уус Алдан, Амма хамаандалара Оонньууларга кыттар путевкалар хаһаайыттарынан буоллулар.

Бастакы лига чөмпүйэнээтин бастыҥ оонньооччуларынан Альберт Бродников (Чурапчы), Марк Васильев (Нам), Максим Кондратьев (Ленскэй), Владимир Сидоров (Чурапчы), Иннокентий Артамонов (Уус Алдан), Валерия Иванова (Амма), Светлана Муратова (Дьокуускай), Екатерина Семеркина (Миирнэй), Ольга Макарова (Амма), Ольга Ершова (Өлүөхүмэ) ааттаннылар.

Кэлэр нэдиэлэттэн манна иккис лига хамаандаларын чөмпүйэнээтэ саҕаланыаҕа. Онно эмиэ Амматааҕы Оонньууларга путевкалар иһин сытыы киирсиилэр буолаллара күүтүллэр.

Роман Попов, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0