Чурапчылары көһөрүү 75 сыла Баахынай үбүлүөйүнүүн алтыста

Бөлөххө киир:

Улуус хайа даҕаны нэһилиэгиттэн Лииндэ быйыл сэргэхтик тэринэн-дьаһанан олорор. Нэһилиэк олохтоохторо ааспыт нэдиэлэҕэ Баахынай бөһүөлэгэ төрүттэммитэ 70 сылын өрө көтөҕүллэн бэлиэтээтилэр. Бырааһынньык буолан баран, ыалдьыттарданара булгу. Ол сиэринэн ыраахтан-чугастан ыалдьыттар муһуннулар.

edersaas.ru


Кинилэр ортолоругар Чурапчы Мугудайыттан нэһилиэк баһылыга Кузьма Пермяков салалтатынан 11 киһилээх дэлэгээссийэ тиийэ сырытта. Мугудай дьонун бу сырыылара хоту көһөрүү 75 сылын кытта ситимнээх буолан, Дьокуускайтан «Степан Аржаков» теплоходунан устан тиийээт, Баахынай утары өрүс уҥуоргу кытылыгар түстүлэр. Манна былыр, бөдөҥсүтүү иннинэ, Сыалаах нэһилиэгэ баара үһү. Мугудай холкуостаахтарын 1942 сыллаахха онно балыкка аҕалбыттар.

Ол саҕана төрөппүттэрин кытта сылдьыспыт оҕолортон иккиэйэх эрэ киһи тиийдэ. Кинилэр – кэргэннии Александра Иннокентьевна уонна Самсон Егорович Сивцевтэр. Самсон көһөрүүгэ тиийэригэр үс саастааҕа үһү, оттон Александра тиийэн олохсуйбуттарын кэннэ төрөөбүт. Дэлэгээссийэҕэ кинилэри таһынан көһөрүү кыттыылаахтарын сэрии кэннинээҕи оҕолоро, аймахтара сырыттылар. Ыалдьыттар төрөппүттэрин, биир дойдулаахтарын кэриэстэригэр өйдөбүнньүк мемориальнай дуосканы илдьэн ыйаатылар.

Чурапчылары көрсө тиийбит Сыалаахтан төрүттээх дьон ийэлэрин-аҕаларын мэтириэттэрин тута сылдьалларын көрөн, ыалдьыттар долгуйан ыллылар уонна сир-дойду иччитэхсийбэккэ турарыттан үөрдүлэр. Бүгүн манна «Тоҥолдо» общиналаах Анатолий Ильинов уонна «Надежда» общиналаах Анатолий Константинов бултууллар, балыктыыллар. Кинилэргэ «Патриот малой Родины» бэлиэлэри туттардылар.

Чурапчы Мугудайын дэлэгээссийэтэ салгыы Баахынай 70 сыллаах үбүлүөйүгэр ыалдьыттаан, мааныга-далбарга сырытта. Онтон улуус киинигэр, Эдьигээн сэлиэнньэтигэр, тиийэннэр көһөрүллүүгэ анаммыт обелиска сибэкки дьөрбөлөрүн уурдулар. Ити курдук атырдьах ыйын 16 күнүгэр Дьокуускайтан турунан бараннар, 21-кэ дойдуларыгар эргиллэн кэллилэр. Уу суолун ороскуотун айан кыттыылаахтара бэйэлэрэ уйуннулар.

Василий НИКИФОРОВ, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0