«Чжода» Дьокуускай куорат 17-с кыбартаалыгар саҥа дьиэни тутуутун саҕалыырга бэлэм

Бөлөххө киир:

Пекин куоракка баар “ZHUODA GROUP” хампаанньа бөлөҕө Дьокуускай куорат 17-с кыбартаалын төрдүттэн саҥардан тутуохтаах.

Александр ТАРАСОВ, «Саха сирэ» хаһыат, edersaas.ru


“ZHUODA GROUP”  хампаанньа бөлөҕүттэн биирдэстэрэ – Москва куораттааҕы “Чжода” инвестиционнай хампаанньа генеральнай дириэктэрэ Янь Чжаньфу Дьокуускай куоракка кэлэн, дьиэни тутуу боппуруоһун быһаарса сылдьар. Төһө да бириэмэтэ ыгымын үрдүнэн, ыйытыыларбар тойон Янь Чжаньфу эппиэттииргэ сөбүлэстэ.
17-с кыбартаалы саҥардан тутуу хаһан саҕаланар?
Биһиги тутууну саҕалыырга бэлэммит эрээри, ситэ быһаарылла илик боппуруостар бааллар. Ити боппуруос бастакы түһүмэххэ эрэ буолбакка, үһүөннэригэр быһаччы сыһыаннаах. Ол курдук, эргэ дьиэттэн дьону көһөрүү уонна инженернэй ситимҥэ технологическай холбонуу буолар. Итини тэҥэ, Кытайтан Россияҕа үбү аһарыы боппуруоһа быһаарыллыан наада. Манна арҕаа дойдулар Россияны кытта сыһыаннаһыыларыгар кэккэ хааччахтааһын баара эмиэ мэһэйдиир. Бу боппуруостары быһаарыыга Россиятааҕы партнердарбытын кытта үлэлии сылдьабыт, бары өйүүллэр. Итилэри чопчулаатыбыт да, дьиэни туппутунан барыахпыт.
Бастакы түһүмэххэ тутуллуохтаах дьиэ хас кыбартыыралааҕый?
Маҥнайгы түһүмэххэ 314 кыбартыыралаах дьиэни, 100 миэстэлээх оҕо саадын уонна 93 миэстэлээх механизированнай массыына турар сирин (автостоянка) тутан үлэҕэ киллэриэхпит.
– Кыбартыыралар сыаналара?
Билигин итини бу диэн этэр кыаҕым суох. Дьокуускай куоракка уонна Россияҕа дьиэ сыанатын кэтии, үөрэтэ олоробут. Көрөн-истэн баран быһаарыахпыт. Дьиэни тутарбыт саҕана чуолкайданыа. Биллэн турар, ырыынак орто сыанатыттан үрдүк буолуо суоҕа.
Олохтоох тутуу хампаанньаларын кытыннараҕыт дуо?
«Чжода» хампаанньа инвестор быһыытынан үбүлүүр. Биллэн турар, олохтоох хампаанньалары кытыннарабыт. Дьиэни киэҥник тарҕаммыт монолитно-каркаснай технологиянан тутабыт. Бу технологияны олохтоох хампаанньалар үчүгэйдик баһылаабыттара биллэр. Аны туран, ирбэт тоҥҥо үлэлиир үөрүйэхтээхтэр. Онон олохтоох тэрилтэлэри кытта ыкса тутуһуохпут. Оттон бэйэбит технологиябытын туһаннахпытына, олохтоохтору кытта Кытай исписэлиистэрэ үлэлиэхтэрэ.
Бастакы дьиэни хаһан үлэҕэ киллэрэҕит?
Биһиги былааммытынан бастакы дьиэни 2017 сыл бүтүүтэ үлэҕэ киллэриэхтээх этибит. Ону ити чопчулана илик боппуруостар баалларынан сибээстээн, 2018 сыл бэс ыйыгар бастакы түһүмэҕи түмүктүөхпүт. Ол гынан баран, барыта түргэнник быһаарылыннаҕына, тутууну болдьоҕор үлэҕэ киллэриэхпит.

* * *

“Чжода”инвестиционнай хампаанньа салалтата Москваҕа баар. Россия тутуутун сокуонунан салайтаран үлэлиир олохтоох тэрилтэ. Пекин, Вейхай, Санья курдук Кытай улахан куораттарыгар, Хэйлунцзян уонна Хэбэй провинцияларыгар улахан дьиэлэри тутар кыахтаах тэрилтэнэн биллэр. Элбэх собуоттаах буолан, тутуу матырыйаалын бэйэтэ хайа баҕарар «уһанар» кыахтаах. Бүтүн оройуоннар, кыбартааллар дьиэлэрин тутар улахан үөрүйэхтээҕинэн биллэр. Кыбартаалга икки мэндиэмэннээх 175 мас дьиэ баарыттан 17-тэ көтүрүү бырагырааматыгар хапсыбыт. Итинтэн 158 дьиэни «Чжода» хампаанньа бэйэтин үбүнэн көтүртэриэҕэ.

Александр ТАРАСОВ, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0