close
Дүпсүн сиригэр хомус тыаһа дьүрүһүйдэ
Култуура - Кыһа - Олох-дьаһах

Дүпсүн сиригэр хомус тыаһа дьүрүһүйдэ

Ахсынньы аам-даам тымныытын аахсыбакка туран, Уус Алдан улууһун Дүпсүн нэһилиэгэр биир кэрэ-бэлиэ түгэн буолан ааста. Европа куораттарынан, бүтүн аан дойдуга саха хомуһун ураты тыаһын дьүрүһүппүт Дүпсүн уолаттарын «Кэскил» бөлөҕөр бастыҥ көрдөрүүлээх (образцовый) ансаамбыл диэн дьоһун аат иҥэриллибитин бэлиэтиир бырааһынньыгы бүтүн оскуола, нэһилиэк, улуус тэрийэн ыытта.

edersaas.ru

Харыс саҕа кээмэйдээх кыракый саха хомуһун сүрэхтэрин ымыыта оностубут бөлөх салайааччылара, Саха Өрөспүүбүлүкэтин үөрэҕин туйгуннара Мария Михайловна Соловьева, Тамара Семеновна Михайлова өр сыллаах сыралаах үлэлэрэ үрдүктүк сыаналанан үөрүөхтэрин үөрдүлэр, астыныахтарын астыннылар. Кырдьык да, тэрээһиҥҥэ сылдьыбыт хас биирдии киһи үөрэ-долгуйа »Кэскил» бөлөх уолаттарын дуоһуйа, сөҕө-махтайа иһиттибит.

Бу тэрээһиҥҥэ күүтүүлээх ыалдьыт буолан, Дүпсүн дьонун сэмээр эрэнэр, киэн туттар ыччата Алдан Рожин хомуска оонньоон иһитиннэрдэ, дьон- сэргэ нохтолоох сүрэҕин долгутта, истиҥ иэйиигэ куустарда.

Ону тэҥэ, эдэркээн уолбут Спиридон Иванов, өрөспүүбүлүкэтээҕи хомус оҥоһугун күрэҕин ситиһиилээх кыттааччыта,  тэрээһин быыстапкатыгар бэйэтин оҥорбут хомустарын көрдөрдө.

Тэрээһин кыттыылаахтара

Биһиэхэ аан дойдутааҕы хомус түмэлин дириэктэрэ Николай Шишигин, түмэл наукаҕа үлэһиттэрэ Августа Макарова, Туйаара Жиркова ыалдьыттаатылар.

Ыалдьыттарбыт бука бары олус талааннаах дьон буолан, тэрээһини олус сэргэхситтилэр. Ол курдук, Дмитрий Куличкин-Быйаман Уус кэлэн бэйэтин хомустарын атыылаата. Баҕалаах дьон хомус атыылаһан үөрдүлэр-көттүлэр.

Ону таһынан, биллэр хомусчут Эркин Алексеев, А.Е.Кулаковскай-Өксөкүлээх Өлөксөй аатынан эбии үөрэхтээһин киинин сүрүн мэтэдииһэ Саргылана Адамова, өрөспүүбүлүкэтээҕи оҕо сайдыытын киинин сүрүн мэтэдииһэ Александра Архипова, ХИФУ доцена Николай Бурцев-Бахсы Уус ыраах айан диэбэккэ, дьоһун ыалдьыт буоллулар.

Уус Алдан улууһунааҕы култуура управлениетыттан тэрээһиҥҥэ начаалынньыгы солбуйааччы Лена Павлова, сүрүн исписэлиистэр Матрена Герасимова, Анна Федорова ыалдьыттаатылар. Кинилэр «Кэскил» бөлөх туһугар “ыалдьар” буолан, куруук  сүбэ-ама, тирэх буолан көмөлөһө сылдьалларын туһунан бөлөх салайааччылара Т.С.Михайлова, М.М.Соловьева  тоһоҕолоон бэлиэтээтилэр, махтаннылар.

Үөрэх управлениетыттан Дүпсүн оскуолатын урукку выпускнига, иитии салаатын сүрүн исписэлииһэ Гаврил Кудрин кэлэн биир дойдулаахтарын кытта үөрүүтүн үллэһиннэ.

Тэрээһин түмүгэр бука бары күргүөмүнэн хомус тыаһатан, ырыа ыллаан биир ситимҥэ киирдибит. Манна даҕатан эттэххэ, хомус туһунан ырыа ааптарынан эмиэ, Дүпсүн оскуолатын бутэрбит Снежана Бурцева буолар. Онон, түмүктээн эттэххэ, Хомус декадатын чэрчитинэн ыытыллыбыт бүтүн нэһилиэк тэрийбит тэрээһинэ умнуллубат үтүөтүк ааста. «Кэскил» бастыҥ көрдөрүүлээх (образцовай)  бөлөх уолаттарын, салайааччыларын, төрөппүттэрин ситиһиилэрэ өссө да хаҥыы, үрдүү, үүнэ турдун!

 

Кристина ЯБЛОВСКАЯ, Дүпсүн.

1
0

Сайт матырыйаалларын ааптар көҥүлэ суох ылар бобуллар.


Notice: Undefined index: comment_notes_before in /var/www/edersaas/wp-includes/comment-template.php on line 2334

два × 5 =

INSTAGRAM ЛИЭНТЭТЭ

Instagram батыһан бар