«Олоҕу олоруу искусствота» диэн быыстапка үлэлиэҕэ

Бөлөххө киир:

Атырдьах ыйын 20-24 күннэригэр Дьокуускайга «Россия-моя история» историческай пааркаҕа «Олоҕу олоруу искусствота» диэн социальнай реклама быыстапката туруоҕа. Саха сиригэр бу быыстапка аан маҥнайгытын буолар, онон, «Эдэр Гвардия» активистара бастакынан социальнай боппуруостары искусство нөҥүө  көрдөрүөхтэрэ.

Чэлгийээнэ БАХСЫРОВА,  edersaas.ru

#МГЕР #ЭдэрГвардия #МедияГвардия #МГЕРДФО #МГЕРЯкутии

Тэрээһин сүрүн сыалынан өрөспүүбүлүкэ олохтоохторун араас сытыы боппуруостарга болҕомтолорун тардыы буолар: наркотигы туттуу; табахтааһын; аһыы утаҕы иһии; терроризм уо.д.а.

Быыстапкаҕа эдэр худуоһунньуктар үлэлэрэ баар буолуоҕа. Бу былаһаакка дьоҥҥо-сэргэҕэ саҥа хартыыналары, талааннаах ааттары арыйыаҕа. Ону таһынан, «Олоҕу олоруу искусствота» диэн бүтүн Арассыыйатааҕы бэстибээл кыттааччыларын социальнай роликтарын көрдөрүөхтэрэ.

Иван СИВЦЕВ, быыстапка тэрийээччитэ, МГЕР активиһа:

— Быыстапкабыт аныгы киһи көрсөр ыарахаттарын туһунан буолар. Күнтэн күн технологиялар киһи сөҕүөн курдук  сайдаллар, ону кытта тэҥҥэ киһи олоҕу көрүүтэ уларыйар. Биһиги быыстапканы көрөөччүлэргэ: «Үтүө сыһыан эрэ нөҥүө ыарахаттары кыайыахха сөп», — диэн өйдөтүөхпүтүн баҕарабыт. Тэрээһиммитигэр сылдьан дьон-сэргэ өйө-санаата үчүгэй диэки уларыйыаҕа диэн эрэнэбит. Киһи олоҕун кытта сибээстээх туох барыта искусство дии саныыбын. Искусство диэн музыка, хартыына, скульптура эрэ буолбатах, үлэ, наука, спорт — бу барыта эмиэ искусство. Туох баар саҥа арыйыылары барытын киһи бэйэтин илиитинэн оҥордоҕо дии. Мин саныахпар, искусство киһи олоҕу дьиҥнээхтии олороругар уонна дуоһуйууну ыларыгар көмөлөһөр.

Вилена ГОГОЛЕВА, Саха сиригэр «МедиаГвардия» бырайыак куратора:

-Биһиги быыстапкабыт Саха сиригэр социальнай рекламаны сайыннарыыга туһаайыллар. Этэллэрин курдук, «Инники билигин  оҥоһуллар». Бу сырыыга биһиги инники туһунан толкуйдуурга сүбэлиибит. Сарсын олохпутун туох күүтэрий? Бу ыйытыкка хоруйу эдэр ыччат номнуо билигин уонна манна бириэхтээх.

От ыйын бүтүүтэ «Медиа Гвардия» салайааччыта Анна РОГАЧЕВА уонна «МГЕР» аан дойдутааҕы хайысхатын салайааччыта Дарья ШАРОВА Армения киин куоратыгар Ереваҥҥа «Олоҕу олоруу искусствота» диэн социальнай быыстапканы туруордулар. Онон, 2019 сылтан бу тэрээһин аан дойду таһымыгар тахсыаҕа.

Чэлгийээнэ БАХСЫРОВА,  edersaas.ru

+1
0
+1
0
+1
0
+1
0
+1
0
+1
0
+1
0