«ДАРХАН УУС» аатын чулууттан чулуулар эрэ сүгэллэр (ХААРТЫСКА)

Бөлөххө киир:

Олунньу 18 күнүгэр “Куруһаала” эргиэн эрээттэригэр «ДАРХАН УУС» Саха сирин тимир уустарын IX сүрүн быыстапката буолан ааста. Тэрээһин өрөгөйдөөх арыллыыта саха төрүт дорҕоонун тарҕатааччы СӨ норуодунай артыыһа Герман уонна СӨ үтүөлээх артыыһа Клавдия Хатылаевтар салайар “Тэтим” этно-бөлөхтөрүн көй дуорааннарыттан, соргулаах дүрбүөннэриттэн саҕаланна. СӨ Тимир уустарын сойууһун бэрэссэдээтэлэ, СӨ Духуобунас академиятын академига, П.А.Ойуунускай аатынан судаарыстыбаннай бириэмийэ лауреата Борис Неустроев-Мандар Уус алгыс тылын эттэ.

Саха ытык-мааны киһитин кэннэ, «ДАРХАН УУС» быыстапканы эҕэрдэ тыллары СӨ Ил Дарханын уонна Бырабыыталыстыбатын дьаһалтатын салайааччы Федор Борисов, СӨ ыччат дьыалаларыгар уонна дьиэ кэргэн политикатыгар миниистирэ Афанасий Владимиров, СӨ культураҕа уонна духуобунай сайдыыга миниистирин солбуйааччы Николай Макаров, СӨ гражданскай Гражданскай общество институттарын сайыннарыы миниистирин солбуйааччы Афанасий Матвеев, Дьокуускайга олорор Таатта улууһун Харбалаах бөһүөлэгиттэн төрүттээхтэр түмсүүлэрин салайааччы, СӨ Үөрэххэ уонна наукаҕа миниистиэристибэтин Үөрэх сайдыытын хааччыйар киинин салайааччы Владимир Аржаков, «Таатта улууһа» МО баһылыгын социальнай хайысхаҕа солбуйааччы Изабелла Сивцева уонна СӨ Тимир уустарын сойууһун толорооччу дириэктэрэ, «ДАРХАН УУС» Саха сирин тимир уустарын сүрүн быыстапкатын тэрийэр бөлөх сүрүннээччитэ Николай Акимов эттилэр.

Дьүүллүүр сүбэни СӨ Тимир уустарын сойууһун бырабылыанньатын чилиэнэ, “Клинок”, “Арсенал” курдук норуоттар икки ардыларынааҕы анал быыстапкалар хас төгүллээх кыайыылаахтара Сарыал Билюкин салайда. Дьүүллүүр сүбэҕэ СӨ Тимир уустарын сойууһун бэрэссэдээтэлин солбуйааччы, Россия тимир уустарын сойууһун чилиэнэ Роман Готовцев-Мындыр Уус, “Дархан Уус” Саха сирин тимир уустарын сүрүн быыстапкатын хас да төгүллээх кыайыылааҕа, суохапчылаах уус  Василий Попов-Бааха Уус; Россия  маастар-асчыта, сахалыы ас “мэтрэ” Иннокентий Тарбахов, СӨ искусствотын үтүөлээх деятелэ, Россия худуоһунньуктарын сойууһун чилиэнэ Дьулустаан Бойтунов, СӨ айылҕа харыстабылыгар миниистирин солбуйааччы Николай Додохов уо.д.а. үлэлээтилэр. Быйыл «Дэгиттэр быһахха» тутулуга суох тургутааччы быһыытынан “Кыымаан” булт кулуубун президенэ, сорсуннаах булчут Александр Тастыгин кытынна.

«ДАРХАН УУС» Саха сирин тимир уустарын IX сүрүн быыстапкатыгар Өлөөнтөн, Сунтаартан, Ньурбаттан, Үөһээ Бүлүүттэн, Бүлүүттэн, Кэбээйиттэн, Тааттаттан, Чурапчыттан, Уус Алдантан, Мэҥэ-Хаҥаластан, Намтан, Хаҥаластан, Алдантан, Дьокуускай куораттан уонна кини чугаһынааҕы бөһүөлэктэртэн, хаһааҥҥытааҕар да элбэх, 50-тан тахса уус кытынна.

Тимир уустарын оҥоһуктарын атыытын сэргэ, «Бастыҥ уус-уран оҥоhуулаах быhах», «Бастыҥ ас быһаҕа» уонна «Дэгиттэр быһах» диэн үс көрүҥҥэ бастыҥнары чопчулуур уонна уустар “оскардарын” иһин куоталаһар күрэстэр ыытылыннылар. Быыстапка киэргэлинэн буолбут «Дэгиттэр быһах» күрэһигэр кыайыылааҕынан, кэннигэр 40 ууһу хаалларан, Чурапчы быһахчыта Анатолий Константинов таҕыста. Итиэннэ, тыҥааһыннаах күрэхтэһиигэ түмүгүнэн, үгэскэ кубулуйбут “оскары” тэҥэ, тимир уустар анал быыстапкаларын тэрийиини саҕалаабыт Серафим Попов биир дойдулаахтарын – Дьокуускай куоракка олорор Таатта улууһун Харбалаах бөһүөлэгиттэн төрүттээхтэр түмсүүлэрин аатыттан булт саатынан наҕараадаланна. Өрүүтүн да элбэх киһи кыттар, быйыл 48 уран тарбахтааҕы күөн көрсүһүннэрбит, «Бастыҥ ас быһаҕа» көрүҥҥэ бастыҥынан, бу куоталаһыыны өрүүтүн иилиир-саҕалыыр саха аар саарга аатырбыт асчыта Иннокентий Тарбахов быһаарыытынан, Үөһээ Бүлүү ууһа Павел Константинов ааттанна. Чулууттан чулуулар эрэ кыттар «Бастыҥ уус-уран оҥоhуулаах быhах» көрүҥүгэр 11 маастартан, күүтүллүбүтүн курдук, бу хайысхаҕа өрүү инники күөҥҥэ сылдьар Таатта талааннааҕа Сергей Тарабукин бастаата.

«ДАРХАН УУС» Саха сирин тимир уустарын IX сүрүн быыстапкатын СӨ Тимир уустарын сойууһа уонна бу тэрээһини аан бастаан саҕалаабыт С.В. Попов доҕотторо, СӨ Культураҕа уонна духуобунай сайдыыга миниистиэристибэтин уонна Дьокуускай куораттааҕы «Таатта» түмсүү өйөбүллэринэн, тэрийэллэр.


«ДАРХАН УУС» САХА СИРИН ТИМИР УУСТАРЫН IX СҮРҮН БЫЫСТАПКАТЫН ТҮМҮГЭ: 

«БАСТЫҤ УУС-УРАН ОҤОҺУУЛААХ БЫҺАХ» (11 кыттааччы)

1 м. Сергей Тарабукин (Таатта)

2 м. Яков Данилов (Таатта)

3 м. Сергей Петров (Дьокуускай)

«БАСТЫҤ АС БЫҺАҔА» (48 кыттааччы)

1 м. Павел Константинов (Үөһээ Бүлүү)

2 м. Елисей Баишев (Мэҥэ-Хаҥалас)

3 м. Иван Тимофеев (Ньурба)

«ДЭГИТТЭР БЫҺАХ» (40 кыттааччы)

1 м. Анатолий Константинов (Чурапчы)

2 м. Александр Терентьев (Хатас)

3 м. Петр Аргунов (Нам)

Гаврил АНДРОСОВ, «Дархан Уус» Саха сирин тимир уустарын сүрүн быыстапкатын пресс-сэкирэтээрэ.

+1
0
+1
0
+1
0
+1
0
+1
0
+1
0
+1
0