Муус устар 18-22 күннэригэр Екатеринбург куоракка Арассыыйа уонна тутулуга суох судаарыстыбалар түмсүүлэрин (СНГ) ыччатын Дельфийскэй оонньуулара буолан ааста. Бу улахан түһүлгэҕэ саха устудьуоннара ситиһиилээхтик кыттан кэллилэр. Станислав ИОВЛЕВ “Саха Сирэ” хаһыат, edersaas.ru
Саха сириттэн Дьокуускай куораттааҕы балет оскуолатын, художественнай училище уонна култуура колледжын устудьуоннара кытыннылар. Балартан түөрт оҕо ситиһиилээхтик кыттан, диплом уонна анал бириис ыллылар. Бэҕэһээ култуура колледжын саалатыгар оонньууга кыттан кэлбит оҕолору үөрүүлээх быһыыга-майгыга чиэстээһин буолла.
Владимир Шадрин — художественнай училище төрдүс кууруһун устудьуона. Тэрээһиҥҥэ тиийэн, саха төрүт оҥоһугун, дьахтар куругар иилинэр киэргэллэрин оҥорон бар дьону сөхтөрдө. Бу сорудах сүрүн сыалынан оҥоһуктар ойууларыгар Азия уонна Европа тиэмэтин таарыйыы буолар эбит. Владимир киэргэлигэр саха төрүт уонна нуучча норуодунай оһуордарын ойуулаабыт, араас киэргэлинэн Арассыыйа, Саха сирэ, Екатеринбург былаахтарын уонна оонньуу гиэрбэтин киллэрэн биэрбит. Хас биирдии кыттааччы үлэтин тута онно имэстэтигэр оҥорбут, сорудахха анаан биэс чаас биэрбиттэр. Ол кэнниттэн дьүүллүүр хамыыһыйа иннигэр оҥоһуктарын тиэмэтин толору арыйан кэпсээбиттэр. Владимир бу көрүҥҥэ Саха сириттэн соҕотоҕун икки үрүҥ көмүс мэтээли ылары ситистэ.
Оттон Дьокуускайдааҕы балет оскуолатыттан Николай Выломов, Никита Рогов уонна Ангелина Сивцева эмиэ ситиһиилээхтик кыттан кэллилэр. Манна бэлиэтээн эттэххэ, финалга балет оскуолаларыттан соҕотох Саха сирин хамаандата эрэ толору састаабынан киирбитэ. Кинилэр анал бириис хаһаайыттара буоллулар.
Ыспыраапка:
Дельфийскэй оонньуу — искусство араас көрүҥэр күрэхтэһии. Ону сэргэ, манна араас быыстапкалары, презентациялары эмиэ тэрийэн ыыталлар. Быйыл Арассыыйа ыччатын Дельфийскэй оонньуута 16-с төгүлүн, оттон тутулуга суох судаарыстыбалар түмсүүлэрин ыччатын Дельфийскэй оонньуута 12-с төгүлүн ыытылыннылар.
Станислав ИОВЛЕВ “Саха Сирэ” хаһыат, edersaas.ru
Хаартыска: СИА.