Дьокуускай куорат баһылыга Сардаана Авксентьева кыылы-сүөлү көмүскүүр тэрилтэлэр бэрэстэбиитэллэрин кытары көрүстэ. Бу туһунан куорат Уопсастыбаннаһы, маассабай биллэрэр-иһитиннэрэр сириэстибэлэри кытары сибээскэ уонна хардарыта үлэҕэ департамена иһитиннэрэр.
Уопсастыбанньыктар бэйдиэ сылдьар, дьэллик ыттары анал сирдэргэ көрөр-харайар туһунан боппуруоһу дьүүллэстилэр. Манна даҕатан, көрүүтэ-харайыыта суох сылдьар ыт ахсаана аҥаардас Дьокуускай куоракка сылга 5 тыһыынчаҕа чугаһыырын эттилэр. Итиэннэ бу Очиченко уулуссатыгар баар пууҥҥа 200 ыты уонна 50 куосканы эрэ быстах кэмҥэ тутар кыах баарын кэпсээтилэр.
Кэпсэтиигэ мустубут дьон кыһалҕаны хайдах да быһаардахха эрэ табылларын тоһоҕолоотулар. Онуоха бастатан туран, хаһаайына суох бэйдиэ сылдьар ыттары, куоскалары босхо стерилизациялыырга эбэтэр чэпчэтиини көрөргө туруорустулар. «Белый Бим» диэн үтүө санааланыы пуондатын салайар Марина Сантаева муниципальнай бэтэринээринэй клиниканы тэрийэргэ этии киллэрдэ. Көрсүһүү кыттыылаахтара, маны таһынан, кыылга-сүөлгэ чиптэри туруорар наадатын эттилэр. Урут ыты иитээччилэр өрөспүүбүлүкэтээҕи ассоциациялара «Лайка» диэн боруода ыттарынан дьарыктанар кулууп кэлэктиибин кытары көмөлөөн ыттарга чиптэри туруортаабыттарын уонна араас сыстыганнаах ыарыылартан көмүскүүр вакциналары босхо оҥорбуттарын, ол үчүгэй түмүгү көрдөрбүтүн туһунан аҕыннылар. Биир улахан кыһалҕа — өлбүт кыылы-сүөлү көмүү — туһунан кэпсэтии буолла. Боппуруоһу сиһилии көрөр туһунан этиини Ыты иитиинэн дьарыктанааччылар өрөспүүбүлүкэтээҕи ассоциацияларын бэрэссэдээтэлэ Станислав Городилов көтөхтө.
Ыты, куосканы таһырдьа күүлэйдэтии быраабылаларын олоххо киллэрии туһунан кэпсэтиигэ, уопсастыбанньыктар уокуруктарга ыты күүлэйдэтэргэ аналлаах саҥа былаһааккалар тутуллалларыгар баҕаралларын биллэрдилэр, маны куорат баһылыга болҕомтоҕо ыларыгар көрдөстүлэр. Сардаана Авксентьева бу эйгэҕэ үлэни тиһиктиир туһуттан киирбит этиилэри көрүөх, үөрэтиэх уонна миэрэ ылыах буолла.
Хаартыска: интэриниэттэн