Өскөтүн аҕыйах нэһилиэнньэлээх ырыынакка биир табаары, эбэтэр өҥөнү хас да киһи атыылыыр түгэнигэр күрэстэһии үрдүүр. Холобур, куоракка саҥа маҕаһыын арыйан туһа суох курдук, хас хардыыҥ аайы атыы-эргиэн кииннэрэ. Урбаан эйгэтигэр киһи тугунан дьарыктанан, бэйэтин атыылаһааччытын булуон сөбүй? Маннык ыйытык хас биирдии урбаанньыты долгутар буолуохтаах.
Муус устар 4 күнүгэр СӨ Бырабыыталыстыбатын бэрэссэдээтэлэ Евгений Чекин Инвестиционнай политикаҕа уонна судаарыстыбаннай-чааһынай партнерствоҕа Ил Дархан иһинэн сүбэ мунньаҕы тэрийэн ыытта.
Сыл ахсын бигэргэнэр региональнай дакылаады истиигэ СӨ Экономикаҕа миниистирин эбээһинэһин толорооччу Денис Белозеров 2017 сыл түмүгүнэн табаар уонна төлөбүрдээх өҥө ырыынагар күрэстэһии туругун уонна сайдыытын туһунан иһитиннэрдэ.
Саха сиригэр табаары уонна өҥөнү туһаныы уопсай туругун ырытан көрүү түмүгүнэн, үрдүк күрэстэһиилээх ырыынакка: атыы-эргиэн, оскуолаҕа киириэн иннинээҕи саастаах оҕону бэлэмнээһин киирдилэр.
Медицинскэй өҥө, массыына суолунан дьону таһыы, эмп-томп атыыта, сибээс өҥөтө күрэстэһии ортотук сайдыбыт ырыынагын ыллылар.
Ситэ сайдыбатах намыһах күрэстэһиилээх ырыынак кэккэтигэр: үөрэнээччини кытта уйулҕа үөрэхтээх учууталлар дьарыктаныылара, туризм индустрията, оҕону эбии үөрэхтээһин, хомунаалынай хаһаайыстыба, нэһилиэнньэни социальнай өртүнэн хааччыйыы, оҕону сынньатыы уонна доруобуйатын бөҕөргөтүү, култуура эйгэтигэр араас өҥөлөр ааттаннылар.
Онон, бу этиллибит эйгэни үөрэтэн, туох эрэ саҥаны толкуйдаан таһаардахха, ырыынакка күрэстэһии кыра буолан, барыстаахтык үлэлииргэ саҥа кыах көстүөн сөп.
Марианна Тыртыкова, edersaas.ru