«ДетСат» айар бөлөх «Үс күн сиргэ» диэн саҥа киинэни устан бүттэ. Онуоха биһиги продюсер Степан Порядинныын саха киноиндустриятын билиҥҥитин уонна кэнэҕэскитин туһунан сэһэргэстибит.
- «Кэскил» киинэттэн саҕалаан «Детсаттар» кэмиэдьийэ жанрыгар утумнаахтык үлэлиигит. Номнуо уон алтыс киинэҕитин бэлэмниигит. Саҥа киинэҕит туһунан кэпсээ эрэ. Артыыстар кимнээҕий, туох туһунан киинэ буоларый, хаһан улахан экраҥҥа көрөбүтүй?
- Эһиили биһиги айар бөлөхпүт уон сыла буолар. Булт туһунан саҥа киинэни үбүлүөйгэ анаатыбыт. Хаһан даҕаны тыаҕа сылдьыбатах куорат уолаттара эһэлэрин кытта бултуу бараллар. Ойуурга, дьэ, мучумааннаналлар. Сценарийы буоларын курдук бэйэбит толкуйдаатыбыт. Уолаттары Гаврил Менкяров, Прокопий Иванов оонньууллар. Былаан быһыытынан эһиил саас улахан экраҥҥа көстүөхтээх.
- Саханы күллэрэр саамай уустук – дииллэр. Ол гынан баран, «Кэскил», «Көҥүл боотурдар», «Кыһын тымныы эрээри, дьоллоох дьоҥҥо ичигэс», «Тартал» о.д.а. киинэлэргит көрөөччү биһирэбиллэрин ылыан ылбыттара. Эһиги көрүдьүөстэргитин хайдах толкуйдуугутуй?
- Олоххо баар түгэннэри таба көрөбүт. Сахаҕа чугас күлүүлээх түгэни ылабыт. Уолаттары кытта мустан уопсай толкуйдуубут. Кып-кыраттан көрүдьүөһү төрөтөн, этэргэ дылы, «без быара» күлээччибит. Ону барытын сурунабыт. Хамаанда буоламмыт, күлүүтэ да суохтан күлүүлээҕи оҥорон таһаарыахпытын сөп. Ону интонация, туттуу-хаптыы быһаарар.
- Билигин киинэ устар студия элбээтэ. Көр-күлүү даҕаны жанрыгар үлэлээччилэр бааллар. Көрөөччүнү былдьаһыы төһө баарый? «ДетСаттар» конкуреннар быһыытынан кимнээҕи көрөҕүтүй?
- Кыралаан баар буолан эрэр. Ханнык баҕарар идэҕэ конкуренция баара үчүгэй, сайдыы оччоҕуна эрэ барар. Элбэх студия баара эмиэ үчүгэй. Биһиги оннук үлүгэр конкуреннары көрбөппүт. Бу сайын уонча киинэ уһулла сылдьар буоллаҕына, онно комедия суоҕун кэриэтэ. Оттон ханнык киинэ үчүгэйин көрөөччү быһаарар.
- Эһиги «Улыбнись» диэн нууччалыы драманы устубуккут. Салгыы кэмиэдийэттэн тэйэн, атын жанрдарга үлэлэһэр санаалааххыт дуо?
- Былаан баар, барытыгар боруобаланаары гынабыт. «Улбынись» сакааһынан уһуллубута. «Сахафильмы» кытта «Дьикти саас» драманы устубуппут. Ол эрээри драма жанрыгар үлэлииргэ бэйэбит ситэ-хото иликпит быһыылаах. Билигин эдэрдэрбит, күлэ-үөрэ сылдьабыт, ол иһин кэмиэдьийэ ордук табыллар курдук.
- Киинэ устуу элбэх үбү-харчыны эрэйэр. Биир киинэҕэ куппут харчыгыт төһө боруостанарый? Үбү-харчыны хантан ылаҕытый?
- Билигин чааһынай студия буоламмыт, киинэ устуута килиэппит буоллаҕа. Дьон киинэни астымматаҕына, харчыҥ боруостаммат. Култуура министиэристибэтэ көмөлөһөр буолла. Сыл аайы студияларга харчыны тэҥинэн тыыраллар. Ол биһиэхэ күүстээх көмө. Биһиги бюджеппытын наһаа дарбаппаппыт. Саха көрөөччүтэ аҕыйах, эбиллибэт. Балтараа, биир мөлүйүөн иһинэн уста сатыыбыт. Онтон элбээтэҕинэ, умайаҕын. Аны киинэ театрдарыгар көрөөччүнү «Голливуд» киинэлэрин кытта тэҥҥэ былдьаһаҕын.
- «ДетСаттар» өрөспүүбүлүкэ таһыгар тахсар былааннааххыт?
- Баар. Табылыннаҕына, Киргизияҕа «Көҥүл боотурдары» саҥалыы көрүүнэн ремейкын эбэтэр иккис чааһын устуохтаахпыт. Былырыын Саха сиригэр киинэ фестивалыгар Киргизияттан коллегаларбытын кытта билибиппит. Эмиэ студиялаах эдэр уолаттар. Бу күһүн бара сылдьыбыппыт. Дойдуларын, үлэлиир усулуобуйаларын көрбүппүт. Биһиги манна киинэ оҥорорбутугар үс ыйдаах сайыны баттаһар буоллахпытына, кинилэргэ куруук сайын.
- Продюсер, артыыс быһыытынан эн санааҕар саха киинэтэ салгыы сайдарыгар туох итэҕэс баарый?
- Киинэ эйгэтигэр идэлээх киһи аҕыйах. Саха киинэтэ синбиир баар буолуоҕа, онон оскуола оҕолоро ити эйгэҕэ үөрэниэхтэрин наада. АГИИК-тан идэлээх артыыстар тахсаллар, оттон үөрэхтээх сценарист, режиссер, звукооператор тиийбэт.
КВН + «ДетСат» = киинэ
Сахалыы КВН 15 сааһыгар «ДетСат» айар бөлөх көрдөөх көкөттөрдүүн кыттыгас киинэ устуохтара.
- Биһиги уруккуттан биир эмит сайын оҕолору мунньан киинэ устуохпутун баҕарабыт. Хамаанда баар. Атырдьах ыйын 10 күнүттэн саҕалаатыбыт. Сүрүн оруолга Игорь Говоров оонньуохтаах. Холбоһуктаах киинэ буоларын быһыытынан, «Детсат» уонна «Саха КВН» өттүттэн артыыстар бааллар. «Саха КВН»-ҥа оонньуур чаҕылхай оҕолору көрдөрүөхпүт. Табыллыннаҕына сыл аайы оҥоро сатыахпыт. Оҕолору да көҕүлүүр күүс буолуо этэ. Холобур, хамаандалар сылы быһа киирсэн бастыыллар, уонна кыайдахтарына, сайыҥҥы киинэҕэ уһуллаллар. Оччоҕуна саҥаттан саҥа сирэй тахсан иһиэ этэ.
Надежда САМСОНОВА
+1
+1
+1
+1
+1
+1
+1