Дьиҥнээх бриллиант хайдах суһумнуурун көрүөҕүҥ!

Бөлөххө киир:

Саха сирин көрөөччүтүн улахан үөрүүтүгэр, лоп курдук биэс сыллааҕыта тэриллибит “Бриллианты Якутии” оҕо үҥкүү ансаамбылын көрбөтөх, кинилэр ситиһиилэрин туһунан истибэтэх, арааһа, аҕыйах буолуо.

Татьяна Маркова, «Саха сирэ» хаһыат, edersaas.ru

Бу биэс сыл иһигэр,  РФ уонна СӨ үтүөлээх артыыһа Афанасий Соловьев уонна СӨ үтүөлээх артыыһа Зоя Соловьева салайааччылардаах эдэр кэлэктиип хайыы-үйэҕэ ситиһиилэрэ үгүс. Ол курдук, Москваҕа “Рождественские звезды-2016” норуоттар икки ардыларынааҕы куонкуруска гран-при, Сочига Оҕо искусствотын бэстибээлигэр гран-при, Шанхайга —“Открытие года” , Турцияҕа – лауреат. Ансаамбыл былырыын Грецияҕа Олимпиада уотун уматыы сиэригэр-туомугар кыттыбыта. “Азия оҕолоро” спортивнай оонньуулар култуурунай бырагыраамаларын кыттыылааҕа. Туймаада ыһыаҕар киэҥ бырагыраамалаах кэнсиэртэри көрдөртүүр. Бүтүн Россиятааҕы, өрөспүүбүлүкэтээҕи куонкурустар лауреаттара.

Оттон бүгүн Өксөкүлээх Өлөксөй аатынан Норуоттар доҕордоһууларын дьиэтигэр “Саха сирин бриллианнара” оҕо үҥкүү ансаамбыла салайааччыларын Зоя Михайловна Соловьева айар үлэтин 30 сылыгар уонна үйэ аҥардаах үбүлүөйүгэр аналлаах “Сияние бриллиантов” – “Бриллиант суһума” диэн улахан кэнсиэргэ кыттар.

Дьоро киэһэҕэ Соловьевтар – Афанасий 30 сыл, Зоя 25 сыл устата айымньылаахтык үлэлээбит кэлэктииптэрэ — С.Зверев аатынан Үҥкүү тыйаатырын артыыстара көхтөөх кыттыыны ылыахтара, үбүлүөйдээх дьүөгэлэрин үҥкүү алыбыгар ылларбыт олоҕун бэйэлэрин искусстволарынан дьүһүйэн көрдөрүөхтэрэ.

Соловьевтар “Бриллианты Якутии” ансаамбыллара, бастатан туран, репертуарыгар аан дойду араас норуоттарын  үҥкүүлэрин киллэрэн, чаҕылхайдык толорон, көрөөччүгэ сөбүлэппитэ. Ол курдук, ансаамбыл “уйгурскай” , “тувинскай”, “кытаайыскай”, “индиийискэй”, монголлуу, нууччалыы, сахалыы уонна хотугу омуктар, о.д.а. үҥкүүлэрин  толоруулара мэлдьи ситиһиилэнэр.

— Биһиэхэ 3-4 сааһыттан 15-гэр диэри куорат араас оскуолаларыттан  100-тэн тахса оҕо дьарыктанар. Үҥкүүлүөн баҕалаах оҕону барытын ылабыт, — диир Зоя Михайловна.

Дьэ, кимнээҕий, бу, “Саха сирин бриллианнара”?

Бастатан туран, Зоя Михайловна кэлэктиип тутаах дьонун – ансаамбылга аан бастакынан, төрүттэниэҕиттэн кэлбит оҕолорун ааттаталыыр. Бу – Дьокуускай куораттаҕы национальнай гимназия 6 “б” кылааһын оҕолоро – үс Айталар – Санникова Айта, Дмитриева Айта, Игнатьева Айта, Алина Неустроева, Ася Дмитриева, Оля Васильева, Максим Исаков, Айсен Алексеев. Онтон ортоку сүһүөх үҥкүүһүттэр кэлэллэр – Вика Гоголева, Настя Андросова, Полина Петрова, Галя Слепцова, Сардаана Ефремова, Юля Алексеева, Дайаана Иванова. Уонна уолаттар — Дима Петров, Никита Петров, Ваня Пинигин, Эдик Софронов. Биллэн турар, ансаамбыл хас биирдии “бриллиантига” бэйэ-бэйэтиттэн уратылаах. Алмаас чочуллан-чочуллан бриллиант буолан тахсарын курдук, бу оҕолор уопуттаах салайааччыларын көмөлөрүнэн эмиэ чочуллан-чочуллан, бука бары хас биирдиилэрэ, күндү таас араас дьикти өҥүнэн суһумнуурун кэриэтэ,  туох эрэ уратылаах, хатыламмат кэрэлээх буолан тахсаллар.

Уһуйааччыларга оҕолор төрөппүттэрэ, биллэн турар, көмө-тирэх, өйөбүл  буолаллар. Онон, бука бары бииргэ түмсэн – “бриллиант суһумун” үөскэтэллэр.

Ансааамбыл репертуара киэҥ. Бүгүн учууталларын үбүлүөйүгэр оҕолор репертуардарын толору кэриэтэ итиэннэ икки үҥкүү премьератын көрдөрүөхтэрэ —  “Дьөһөгөй” уонна “Хомус”.

— “Хомус” үҥкүүнү 40 кыыс толорор – улахаттар, ортолор уонна кырачааннар бөлөхтөрө. Бу үҥкүүнү биһиэхэ Искусство оскуолатын преподавателэ Сардаана Романовна Осипова бэлэхтээбитэ. Аан бастаан “Этигэн хомус” ырыа куонкуруһун аһыыга үҥкүүлээбиппит, — диир салайааччылара.

Зоя Соловьева бэйэтэ эмиэ үөрэнэр, ол курдук, кини Лилия Соловьева “Дива” үҥкүү оскуолатыгар сөбүлээн дьарыктанар. Онон, үбүлүөйдээх дьоро киэһэтигэр, биллэн турар, көрөөччүтүгэр эмиэ соһуччу кэрэ бэлэхтээх буолуоҕа.

Саҥа ситиһиилэри, “Саха сирин бриллианнара”!

+1
0
+1
0
+1
0
+1
0
+1
0
+1
0
+1
0