Муус устар 26 күнүгэр буолбут Ил Дархан быһа эфиригэр киирбит ыйытыы (кылгатылынна):
“1961 сыллаах төрүөх В. көрдөhүү сурукпун суруйдум. 1978 сылтан совхоз араас үлэтигэр доярканан, ньирэй көрөөччүнэн, заправщигынан, хачыгаарынан 25 сыл үлэлээбитим. 2003 сыллаахха Бороҕоҥҥо көhөн киирэн баран, 12 сыл детсадка, интэринээккэ поварынан, муоста сууйааччынан үлэлээбитим. Кэргэним ыарахан ыарыыттан 2014 күн сириттэн күрэммитэ. Былырыын 2016 сыллаахха бүөрүм аккаастаан, 2-с группалаах инбэлииккэ тахсан, Дьокуускай куоракка диализнай кииҥҥэ эмтэнэ сылдьабын. 2 этээстээх эргэ мас дьиэ кыра хоһугар ыйга 10 тыhыынча солкуобайга устудьуоҥка кыыспынаан куортамнаhан олоробут. Ыйдааҕы биэнсийэм 17 тыhыынча солк., туохха да тиийбэт. Үлэлиир кыаҕым суох, биэнсийэттэн биэнсийэҕэ диэри аһыыр-аһаабат олоробут. Эhигиттэн материальнай көмө көрдөhөбүн.
Эрэнэ хааллым Марфа Ивановна”.
Үлэ, социальнай сайдыы министиэристибэтэ эппиэттиир:
“Ыарахан балаһыанньаҕа түбэспит, кыаммат дьоҥҥо уонна ыалларга аадырыстаах материальнай көмө оҥоһуллуутун” 2-с разделын 2.1 пуунугар олоҕуран, бастайааннай диализнай эмтэниини бара сылдьар инбэлиит киһи, дьиэ куортамыгар көмөнү ылар.
Ону таһынан, маннык аадырыстаах көмөнү ылыан сөп:
—олорор сиртэн көһөн, өрөспүүбүлүкэ тас өттүгэр 2 ыйтан ордук кэмҥэ эмтэнэ (эбэтэр ыалдьар оҕону, инбэлиити арыаллаан) бардахха, ас-үөл, олоруу ороскуоттара төлөнөллөр;
— доруобуйа туругар улахан суолталаах эмтэри, медицинскэй өҥөлөрү ылыы төлөнөр (босхо медицинскэй көмө территориальнай бырагырааматын таһынан);
— ас-үөл бородууктатын, таҥаһы атыылаһарга көмө оҥоһуллар: тиийинэн олоруу кээмэйиттэн алын дохуоттаах инбэлииттэргэ, элбэх оҕолоохторго, үлэтэ суохтарга.
Маннык докумуоннар наадалар:
Сайабылыанньа (ханнык ыарахан балаһыанньаҕа түбэспитиҥ ыйыллар);
Пааспар, эбэтэр сибидиэтэлистибэ;
Инбэлииккэ тахсыы туһунан МСЭ ыспыраапката;
Үлэ киниискэтэ, ИНН, баан счетун нүөмэрэ.
Сайабылыанньаны олорор сиргэ баар Социальнай көмүскэл управлениетыгар тиийэн бэриллэр, онно толору консультацияны ылыахха сөп. Аадырыстаах тус көмөнү биэрэри анал хамыыһыйа быһаарар. Көмө бэриллэр буоллаҕына, сайабылыанньалаах киһи счетугар түһэр, эбэтэр почта нөҥүө тиэрдиллэр.
Эбэн эттэххэ
Дьокуускайга 350-ча киһи диализ өҥөтүнэн туһанар. Доруобуйа харыстабылын министиэристибэтин кылаабынай хирура иһитиннэрбитинэн, диализка эмтэнээччилэргэ дьиэ куортама уонна айан ороскуотугар 3 тыһ. солк. төлөнөр. Бүддьүөт суотуттан “Мимпара”, “Ренагель”, “Земплар” диэн сыаналаах эмтэри босхо биэрэллэр. Ону тэҥэ, бүөрдэрэ ыалдьар дьону Новороссийскай уонна Геленджик куораттарга санаторийдарга баран эмтэнэргэ ыыталлар.
Ангелина ВАСИЛЬЕВА, «Саха сирэ” хаһыат, edersaas.ru