Дьиэни тутар хампаанньалар сыаналарын үөрэтэн көрдөххө, Дьокуускайга олорор дьиэ сыаната халбаҥныы, уларыйа турар. Биир квадратнай миэтэрэтэ ортотунан 55 тыһ. солк. саҕалаан 80 тыһ. солк. тиийэр. Оттон Россия атын регионнарыгар сыана хайдаҕый?
«Российская газета» хаһыат суруйарынан, саамай сыаналаах куоратынан Москва буолар. Биир квадратнай миэтэрэтэ 90 тыһ. 400 солк. тэҥнэһэр. Оттон Калмыкияҕа баара-суоҕа 26 тыһ. 10 солкуобай.
Санкт-Петербург куоракка 62 тыһ. 228 солк. быһыллыбыт. Уһук Илин регионугар сыана араастаһар. Сахалиҥҥа – 57 тыһ. 527 солк., Ямало-Ненецкэй автономнай уокурукка – 49 тыһ. 60 солк.
Саамай чэпчэки сыаналаах регионнарынан Ингушетия (26 тыһ. 395 солк.), Адыгея (26 тыһ. 490 солк.), Дагестан (27 тыһ. 110 солк.), Ставропольскай кыраай (27 тыһ. 230 солк.) буолаллар. Бу РФ Тутуутун министиэристибэтэ нуорма быһыытынан суоттаан таһаарбыт сыаналара. Дьиҥ сыана чыҥха атын. Холобур, Москваҕа иккис ырыынакка квадратнай миэтэрэ сыаната ортотунан 179 тыһ. солк., оттон саҥа дьиэҕэ 156 тыһ. солк. ааҕыллар.
Анивера Акимова, «Саха сирэ» хаһыат, www.edersaas.ru