Бэс ыйыттан куоракка элбэх этээстээх дьиэҕэ олорор дьон дьиэ-уот төлөбүрүн төлүүргэ саҥардыллыбыт, судургутуллубут квитанцияны тутуохтара. Хомунаалынай өҥө хас биирдии көрүҥүгэр тарыып кээмэйэ, итиэннэ ыйга төһөнү туттубуппут, төлүүр суумабыт тус-туһунан строканан ырылыччы суруллуо. Маннык уларыйыы Тутуу министиэристибэтин бирикээһигэр олоҕуран оҥоһуллуо.
edersaas.ru
Урукку квитанция аны туттуллубат буолуо, саҥаҕа төлөбүр докумуонун идентификатора, тус сирэйдээх счет нүөмэрэ, уопсай бас билии (подъезд, көрүдүөр сырдатыыта, ититиитэ о.д.а) эбиллиэ. Ону таһынан, салайар хампаанньа, эбэтэр дьиэни бас билээччилэр табаарыстыбаларын ыстарааба, иэс кээмэйэ, төлөбүр төһө үрдэтиллибитэ ыйыллыа.
Олохтоохтор ОДьКХ ГИС судаарыстыбаннай информационнай ситимҥэ киирэн, идентификатор көмөтүнэн квитанция дьиҥнээҕин-суоҕун бэрэбиэркэлиир кыахтаныахтара. Салайар хампаанньа хас биирдии төлөбүрү ОДьКХ ГИС киллэрбэтэҕинэ ыстарааптаныа.
Биир дьиктитэ, хапытаалынай өрөмүөн усунуоһа сотуллан, ол төлөбүрэ дьиэни көрүү-истии уонна хомунаалынай өҥө төлөбүрүгэр холбуу суруллуоҕа.
Оттон өҥө биэрээччини кытта быһа дуогабар түһэрсиллибит түгэнигэр хомунаалынай өҥө хас биирдии көрүҥүн аайы тус-туһунан докумуон бэчээттиэхтэрин сөп.
Төлөбүр докумуонуттан киирэр харчы онон-манан эргийбэккэ быһаччы өҥө биэрээччи (холобур, «Якутскэнерго», «Водоканал», хапытаалынай өрөмүөнү оҥорооччу о.д.а.) счеттарыгар киирэрин ситиһиэхтэрэ. Билиҥҥитэ сорох салайар хампаанньалар нэһилиэнньэттэн төлөбүр харчытын хомуйан баран уоту, гааһы, ууну биэрээччилэргэ ыыппакка уһата-кэҥэтэ сылдьаллар.
Өссө биир интэриэһинэй түгэн – дойду бэрэсидьиэнэ В. Путин муус устарга төлөбүр квитанциятыгар коммерческай рекламаны таһаарары бобор сокуоҥҥа илии баттаабыта. Онтон атын хайысхалаах иһитиннэрэр-сырдатар биллэриини бэчээттиир бобуллубат.
Хаартыска: интэриниэттэн
Марианна Тыртыкова, «Саха сирэ», edersaas.ru