Өссө биир оҕуруктаах өйдөөх, сирэйэ-хараҕа суох албын-түөкэй дьахтарга суут бириигэбэрэ тахсыбыт.
Вера МАКАРОВА, «Саха сирэ» хаһыат, edersaas.ru
Бу дьыала туһунан «Саха сирэ» хаһыакка суруйан турабыт. Кыбартыыра, баай-мал туһуттан дьону маннык сидьиҥник атаҕастааччылар баалларыттан киһи эрэ кыһыйар-абарар!
Суут быһаарбытынан, Дьокуускай куораттан төрүттээх 49 саастаах дьахтар түптээн үлэлиир сирэ суох, хантан да дохуот киллэриммэт буолан, уодаһыннаах былаан толкуйдаабыт — наркологическай диспансерга бииргэ эмтэммит, биир хостоох дьиэтигэр соҕотоҕун олорор дьахтар кыбартыыратын хайдах эмит гынан былдьаабыт киһи диэн санааҕа ылларбыт.
Онтун ситиһээри, 2012 сыл ыам ыйыгар уонна бэс ыйыгар бэйэтэ да арыгыһыт дьахтарга буокка атыылаһан аҕала-аҕала иһэрдэр идэлэммит.
Итирдэр утах дьайыытыгар оннук туймаарыйа сылдьар дьахтары уонна кини ийэтин бу түөкүн мүөттээх тылыгар киллэрэн, кыбартыыра докумуонугар илии баттаппыт. Албаһа диэн — дьиэҕитин куортамҥа биэрэргэ көмөлөһөрбөр, коммунальнай өҥөҕүтүн төлүүргэ чэпчэтии ыларгытыгар эһиги нотариуһунан бигэргэппит докумуоҥҥут наада диэн.
Ол «доверенность» докумуонун илиитигэр ылаат, албын дьахтар кыбартыыраны 2.100.000 солк. суумаҕа атыылаан кэбиспит. Ол харчыны барытын, биллэн турар, бэйэтигэр ылбыт.
Онон сөп буолбакка, дьиэтиттэн маппыт дьахтары арыгылааһынтан эмтэтэ диэн, Новосибирскай куоракка реабилитационнай кииҥҥэ илдьэн хаалларбыт.
Суут бу дьахтары РФ Холуобунай кодексатын 159-с ыст. 4-с чааһынан буруйдааҕынан билинэн, 5 сыл көҥүлүн быһары усулуобунайынан ааҕан, 5 сыл тургутар болдьоххо уурбут. Бириигэбэр сокуоннай күүһүгэр киирэ илик.
Бу туһунан СӨ Борокуратууратын пресс-сулууспата иһитиннэрдэ.
Вера МАКАРОВА, «Саха сирэ» хаһыат, edersaas.ru
Хаартыска: интернеттэн.