Дмитрий Аксенов көҥүл тустууга Арассыыйа чөмпүйэнээтигэр 57 киилэ боруонсатын хаһаайына (ВИДЕО)
Бөлүүн ыытыллыбыт 57 киилэ финальнай хапсыһыыларыгар Дмитрий Аксенов Дагестан бөҕөһүн Рамазан Ферзалиевы 9:4 ахсаанынан кыайан, боруонса мэтээл хаһаайына буолла. Бастакы эргииргэ кини Арсланали Казавовы 12:2 ахсаанынан холкутук кыайбыта. Иккис эргииргэ Абдулвагав Шахбановы 6:1 ахсааннаах хотон үһүс эргииргэ ааспыта. Үһүс эргииргэ Дмитрий Тыва киэн туттар уолун Дондуук Хуреш Оолу 3:1 ахсаанынан баһыйан, полуфиналга 2017 сыллаах «Иван Ярыгин» Гран-При чөмпүйүөнүгэр Дагестан бөҕөһүгэр Заур Угуевка сабырыйтаран, финалга ааспатаҕа. Ол курдук, Дмитрий Саха Өрөспүүбүлүкэтин хамаандатыгар иккис мэтээли аҕалла. Чөмпүйэнээт бастакы күнүгэр Виктор Рассадин 61 киилэ үрүҥ көмүс призера буолбута. 57 киилэҕэ финалга Заур Угуев Артем Гебековы кыайан, чөмпүйүөн үрдүк аатын сүктэ. Оттон бүгүн Алексей Иванов, Константин Власов, Ларион Андреев, Серафим Яковлев 65 киилэҕэ диэри, Дьулустаан Сивцев 74 киилэҕэ диэри уонна Евгений Коломиец 97 киилэҕэ диэри тустуохтара. Уолаттарбыт киирсиилэрин аллараа ссылканан киирэн быһа эфиргэ 16:00 чаастан көрөөрүҥ.
ВИДЕО:
Быһа биэриини 16:00 чаастан бу ссылканан көрүҥ:
Николай Попов «Саха Сирэ» хаһыат, edersaas.ru