Икки сыллааҕыта Амма улууһун Чапчылҕан орто оскуолатын дириэктэрэ Дмитрий Давыдов саҥа киинэ сценарийын суруйан саҕалаабыта. Сценарий нууччалыы суруллубута, оттон киинэ сахалыы уһуллубут. «Сахафильм» хампаанньа уонна Амма улууһун салалтата өйөбүллэринэн «Костер на ветру» диэн сиппит-хоппут киинэ таҕыста. Бүгүн, муус устар 14 күнүгэр Дьокуускай куорат бары киинэ театрдарыгар сүрэхтэниэҕэ.
«Костер на ветру» киинэни 2014 сыл күһүнүгэр Аммаҕа 15 күн иһигэр устубуттар. Киинэ жанра – драма. Манна тыа сирин олоҕо, олохтоохтор бэйэ-бэйэлэрин кытта сыһыаннара көстөр. Ис хоһоонуттан быһа тардан кэпсээтэххэ, улахан айдаан, киһи өлөрсүүлээх быһылаан кэнниттэн биир дэриэбинэҕэ олорор кырдьаҕастар тустарынан буолар. Сүрүн оруолларга – Алексей Устинов, Николай Солдатов, Михаил Лазарев, Радислав-Кудай Захаров оонньоотулар. Кинилэр Амма норуодунай театрын артыыстара буолаллар.
Киинэни Дмитрий Давыдов бэйэтэ режиссердаабыт. Кини аата саха киинэтин эйгэтигэр саҥа, сонун. Дмитрий санаатын үллэстэр:
— Идэтийбэтэх артыыстары кытта үлэлиир чэпчэки эбит. Биир дойдулаахтарым буоланнар, хас биирдиилэрин билэрбин, онон оруоллары бэйэм түҥэппитим. Урут хаһан даҕаны киинэҕэ уһуллубатах буоланнар, бэйэлэрэ хайдах баалларынан оонньоотулар. Ол быдан итэҕэтиилээхтик көһүннэ. Бу киинэни икки сыл аннараа өттүгэр устубуппут, онтон үп-харчы булбаккабыт, киинэ үлэтэ биир сыл тохтуу сылдьыбыта. Устууга наада буолбут харчыны үксүн бйэм уйуммутум, тыа сиригэр уһуллубут буолан улахан бүддьүөт наадата да суох курдук этэ. Кэнэҕэс араас фестивалларга кыттыахпын баҕарабын, киинэни кытта ыкса үлэлиир былааннаахпын.
Саҥа саҕалыыр режиссерга номнуо идэтийбит оператор Иван Семенов, звукооператор Иннокентий Сивцев, худуоһунньук Сергей Слепцов күүс-көмө буоланнар, сонун киинэни бэлэмнээтэхтэрэ буолуо дии эрэнэбит.
Айтана АММОСОВА