Дмитрий Коркин 90 сылыгар. “Коркин оскуолатыттан” куорсун анньыммыттар

 Дмитрий Коркин Саха сиригэр спорт сайдыытыгар, Арассыыйа таһымыгар тахсыыга улахан суолу-ииһи хаалларбыт сүдү тириэньэрдэртэн биирдэстэрэ. Чурапчыга үлэлээбит 20 сылын устата Саха сирин, Бүтүн Арассыыйаны, Сойууһу аан дойдуга аатырдыбыт тустууктар үүнэн-үөскээн тахсыбыттара. Сахалартан үс олимпиец, Европа, аан дойду чөмпүйүөннэрэ уонна призердара, түөрт спорт үтүөлээх маастара Д.П. Коркин оскуолатыттан куорсун анньыммыттара.

Д.П. Коркин тириэньэр быһыытынан бастакы ситиһиилэрэ 1960 сыллартан саҕалаан сыыйа кэлэн барбыттара. Ол курдук, Арассыыйа «Урожай» ДСО-н Киин Сэбиэтин күрэхтэһиитигэр саха оҕолоруттан бастакы чөмпүйүөн Коля Барашков, Бүтүн Арассыыйа оҕолорун ортолоругар бастакы чөмпүйүөн Коля Сивцев, Сойуус оҕолорго бастакы чөмпүйүөнэ Слава Карпов, Сойууска эдэр ыччаттарга бастакы чөмпүйүөн Алексей Ермолаев, ССРС тыатын сирин спортсменнарын бастакы чөмпүйүөнэ Николай Захаров, аан дойдуга оҕолорго бастакы чөмпүйүөн Илларион Федосеев, ССРС-ка, Европаҕа, аан дойдуга, Олимпийскай оонньууларга бастакы чөмпүйүөн Роман Дмитриев, ССРС кубогын бастакы хаһаайына Петр Платонов, бастакынан аан дойдуга үс төгүл чөмпүйүөн аатын ситиспит Павел Пинигин, «Үтүө дьулуур» оонньууларын бастакы чөмпүйүөнэ Василий Гоголев, Куба — РСФСР – САССР тустууктара кыттыылаах дойдулар икки ардыларынааҕы турнирдар кыайыылаахтара Владимир Андросов, аан дойду Универсиадатын призера Прокопий Шестаков, уо.д.а. биллэр спортсменнар бу кыһаттан иитиллэн тахсыбыттара.

Итинник сыралаах, дьаныардаах үлэ түмүгэр эрэ, кимтэн да ураты, ханна да суох туспа суоллаах-иистээх көҥүл тустууга «Коркин оскуолата», «Коркин буочара» диэн ааттаммыт Чурапчытааҕы оҕо спортивнай оскуолатын тустууга отделениета үөскээбитэ уонна үлэтин күн бүгүҥҥэ диэри эрчимнээхтик, эрэллээхтик салгыыр.

1966 сыллаахха дириэктэр Алексей Спиридонович Шадрин быһаччы туруорсуутунан, бу интэринээт-оскуола иһинэн Саха АССР Үөрэҕин министиэристибэтэ оҕо спортивнай оскуолатын аспыта. Оскуола үлэтин туһаайыыта эдэр спортсменнары иитиигэ ууруллубута. Ону педагогическай коллектив чуолкайдык өйдүүрэ уонна араас өрүттээх иитэр-үөрэтэр үлэни утумнаахтык ыытара. Учууталлар Николай Николаевич Павлов—Тыаһыт, Семен Ильич Жирков, Ирина Степановна Шадрина, Екатерина Семеновна Лукина, Наталья Никитична Ботучина, Василий Федотович Ермолаев, Анна Михайловна Ермолаева, Иван Михайлович Павлов, Иннокентий Романович Михайлов, Анна Александровна Платонова, Дария Степановна Терютина (Яковлева), иитээччилэр: Роман Романович Абрамов, Евдокия Яковлевна Барашкова, Варвара Романовна Сидорова, Константин Константинович, Егор Константинович Осиповтар, Владимир Семенович Макаров, Анна Афанасьевна Попова, Афанасий Константинович Матвеев, Ирина Дмитриевна Ефремова, Петр Васильевич Неустроев, уо.д.а. араас улуустартан хомуллан кэлбит оҕолору иитиигэ үгүс сыраларын биэрбиттэрэ, бэйэлэрин оҕолорунааҕар ордук бүөбэйдээн көрөллөрө-харайаллара.

Бөтүрүөбүс спорт-оскуолаҕа үлэлиир кэмигэр элбэх сыллар усталарыгар интэринээт-оскуола месткомун бэрэссэдээтэлинэн талыллан үлэлээбитэ. Төһөлөөх үгүс местком мунньахтара ыытыллыбыттара буолуой? Ол кэмнээҕи дьаһаллар бары бириэмэтигэр булгуччу ыытыллалларын, ылыныллыбыт хайаан да туоларын, ыҥырыллыбыт дьон бары баар буолалларын, бириэмэ тутуһулларын кытаанахтык ирдиирэ. Үлэһит киһи олорор усулуобуйатын тупсарыыга, олорор территорияны ыраастаныыга, бэрээдэккэ үгүс үлэ ыытыллара.

Улуу тириэньэр, саталлаах салайааччы ыытар үлэтин бары өттүнэн өйүүр, биир сыаллаах-соруктаах үлэһит коллективтаах буолан, Дмитрий Петрович итинник улахан ситиһиилэннэҕэ. Төрөөбүт Чурапчытын, Сахатын сирин аар саарга ааттатар үрдүк кылаастаах тустууктары иитэн-эрчийэн таһаардаҕа. «Мин олохпор, үлэлиир кэммэр үгүс үчүгэй, үтүө дьону кытта көрсүһүүм-үйэбэр өйөбүл буолбута», — диэн этэн турардаах.

1969 сыл Саха сирин тустууну сэҥээрээччилэригэр дьоллоох түһүлгэ да, улахан хомолто, аһыы да сыла этэ. Роман Дмитриев Аргентина Мар-дель-Плато куоратыгар аан дойду чөмпүйэнээтигэр аан бастаан кыттан, үрүҥ көмүс мэтээли ылары ситиспитэ. Сайын АХШ Боулдер куоратыгар оҕолор ортолоругар аан дойдуга бастыыр иһин бастакы чөмпүйэнээт ыытыллыбыта. Ол күрэхтэһиигэ 48 кг Илларион Федосеев оҕолорго аан дойду чөмпүйүөнүн аатын сүкпүтэ, 52 кг Семен Макаров боруонса мэтээли ылбыта.

Бу сылларга саха тустууктарыгар хараҥа былыт бүрүүкээбитэ. Аммаҕа Сахаачча (саха тустуутун уһулуччулаах маастара Николай Захаров), Бахсыга Коля Барашков, кэлин армияҕа сулууспалыы сылдьар Павел Васильев сөмөлүөт саахалыгар түбэһэн, тустар талааннара ситэ арыллыбакка, Орто дойдуттан барбыттара.

Дмитрий Коркин 90 сылыгар. Булгуруйбат дьулуурдаах, күүстээх санаалаах

Д.П. Коркин соратнига, СР үтүөлээх тириэньэрэ, РФ ФК уонна спорка үтүөлээх үлэһитэ, Чурапчы улууһун бочуоттаах олохтооҕо К.С. Постников суруйбут дакылаатыгар олоҕуран ахтыыны таһааттарда Д.П. Коркин аатынан музей дьиэ уонна спорка албан аат музейын дириэктэрэ, СӨ ФК уонна спорка үтүөлээх үлэһитэ, Д.П. Коркин аатынан СӨ ФК уонна спорка судаарыстыбаннай бириэмийэтин лауреата (2010), Чурапчы улууһун бочуоттаах олохтооҕо Егор Васильевич Пудов.

(Бүтүүтэ тахсыаҕа.)