“Маста олорт” диэн Бүтүн Арассыыйатааҕы акция чэрчитинэн, Өксөкүлээх Өлөксөй аатынан Норуоттар доҕордоһууларын дьиэтин аттыгар аллея олортулар. Бу сир Доҕордоһуу аллеята диэн ааттанна.
Ангелина Васильева, “Саха сирэ” хаһыат, edersaas.ru
Акцияҕа кыттыбыт дьон бу тэрээһини Саха сирэ Арассыыйа састаабыгар холбоспута 385 сылыгар анаатылар.
Барыта 52 дөлүһүөн, тиит, бэс мас уктарын олортулар. Нуучча, татаар, киргиз общиналара, Гражданскай уопсастыба институттарын сайыннарыы миниистирин бастакы солбуйааччы Иван Луцкан көхтөөх кыттыыны ыллылар.
“Бу аллея Норуоттар доҕордоһууларын дьиэтин аттыгар баар буолбута мээнэҕэ буолбатах. Бу дьиэҕэ биһиги өрөспүүбүлүкэбитигэр олорор, үлэлиир элбэх норуоттар национальнай түмсүүлэрэ мусталлар, Саха сирин сайдарын туһугар үлэлииллэр-хамсыыллар. Мантан, чахчы, норуоттар доҕордоһуулара тарҕанар диэтэхпинэ, сыыспатым буолуо. Онон бу аллея биһиги элбэх норуоттаах өрөспүүбүлүкэбитигэр доҕордоһуу бэлиэтинэн буолар. Бу тэрээһинининэн министиэристибэ уонна Ыччат бырабыыталыстыбата көҕүлээбит бырайыактарын саҕалаатыбыт”, — диэн Иван Луцкан бэлиэтээтэ.
Экология сылыгар саҕаламмыт үтүө дьыала киин куорат биир кэрэ-бэлиэ миэстэтигэр кубулуйдун! Куйаас күҥҥэ хойуу лабааларынан сөрүүкэттин, кэрэ көстүүтүнэн киһи хараҕын сымнаттын. Төһөнөн күөх үүнээйи элбиир да, соччонон үчүгэй, куорат көстүүтүн тупсарар.
Ангелина Васильева, “Саха сирэ” хаһыат, edersaas.ru