Олохтоох бэйэни салайыныы уорганнара сыллата тас дойдулары кытта бииргэ үлэлээһини сайыннараллар.
Бүгүҥҥү туругунан Саха сирин уон муниципальнай тэриллиитэ икки өрүттээх сөбүлэһиилэргэ олоҕуран тас дойдулар 16 административнай- территориальнай тэриллиилэрин кытта бииргэ үлэлэһэр. Бу туһунан СӨ Ил Дарханын, бырабыыталыстыбатын дьаһалтатын СМИ-лэри кытта үлэҕэ управлениета иһитиннэрэр.
Ол курдук, “Мэҥэ Хаҥалас улууһа” муниципальнай оройуон уонна КНР Хэйлунцзян провинциятын Муданьцзян куоратын бырабыыталыстыбатын икки ардыларыгар 2010 сыллаахха түһэрсиллибит бырааттыы бииргэ үлэлээһини олохтуур туһунан сөбүлэһиилэригэр олоҕуран шорт-треги уонна остуол тенниһин сайыннарыыга үлэ барар.
2014 сыллаахха Саха сирин историятыгар аан бастаан “Эллэй Боотур” спорт комплексыгар Муданьцзян куораттан аан дойдутааҕы кылаастаах тренер Цай Хайфен кыттыылаах шорт-трекка үөрэтэр-эрчиллэр дьарык ыытыллыбыта.
2015 сыллаахха Саха сирин тренердэрэ уонна спортсменнара Кытайга тахсан шорт-трекка стажировкаламмыттара. Онно сылдьыбыт эдэр спортсменнар өрөспүүбүлүкэтээҕи кыһыҥҥы спартакиадаҕа ситиһиилээхтик кыттыбыттара.
2016 сыл сайыныгар Муданьцзян куорат оҕо спортивнай оскуолатын дириэктэрэ Ван Тюшэн Майаҕа кэлэн остуол тенниһигэр уонна буоксаҕа холбоһуктаах эрчиллиилэри ыыппыта.
2014 сыл от ыйын 2 күнүгэр Кытайга хапсаҕайга Муданьцзян куорат бастакы күрэхтэһиитэ буолбута. Ити сыл атырдьах ыйыгар Мэҥэ Хаҥалас улууһуттан уон биир оҕо Муданьцзян куорат үөрэххэ управлениетын ыҥырыытынан, өйөбүлүнэн Кытайга сынньаммыта.
“Дьокуускай куорат” куораттааҕы уокурук уонна Былыргы Олимпия куорат (Греция) бииргэ үлэлээһиннэрэ сайдар. 2013 сыл балаҕан ыйыгар, Сочи куоракка ыытыллыбыт XXII кыһыҥҥы Олимпийскай оонньуулар уоттарын уматыы тэрээһинин чэрчитинэн, Дьокуускай куораты билиһиннэрии тэриллибитэ. Былыргы Олимпия киин болуоссатыгар икки куорат доҕордоһуутун бэлиэтэ буолбут саха сэргэтэ туруоруллубута.
2016 сыл от ыйыгар Былыргы Олимпия делегацията “Азия оҕолоро” норуоттар икки ардыларынааҕы VI Спортивнай оонньууларга кыттыыны ылбыта. Греция эдэр спортсменнара Оонньуулар тэрээһиннэриттэн, ыалдьытымсах Саха сирин олохтоохторуттан олус диэн астынан, сөҕөн-махтайан барбыттара.
Роман Попов, “Саха сирэ” хаһыат.