Бу сыл саҥатыгар Чурапчы улууһуттан Дьокуускайга кэлэн, предприниматель кыргыттар миниистир Антон Сафроновы кытта анаан көрсөн, кыраһыабай буолуу киинин аһаарга сүбэлэспиттэр.
edersaas.ru
Кинилэр миниистиргэ улуустарга кыраһыабай буолуу кииннэрин аһан үлэлэтэр исписэлиистэри үөрэтэр хайысханы тобулбуттарын туһунан билиһиннэрбиттэр. Үлэлэрин «Лэшмейкер идэтин кытта билсии» диэн босхо сэминээртэн саҕалаары гыналларын туһунан эппиттэр. Миниистир кэккэ сүбэни биэрэн, өйүүрүн биллэрбит.
— «LASH LOCATION» диэн элбэх хайысхалаах кыраһыабай буолуу киинин анал сертификаттаах предпринимателлэр Марианна КУЗЬМИНА, Мария ИВАНОВА уонна Анна СОКОЛОВА үлэлэтэн эрэллэр. Кинилэр хамаандаларыгар кыраһыабай буолуу араас көрүҥүн үчүгэйдик билэр аҕыс эдэр исписэлиис үлэлиир.
Саҥа аһыллыбыт кииҥҥэ дьиэнэн көмөлөспүт «Чурапчы нэһилиэгэ» МТ баһылыга Степан САРГЫДАЕВКА эдэр предпринимателлэри өрүү өйүүрүгэр махталбын тиэрдэбин, — диэн СӨ Инвестиция сайдыытыгар уонна предпринимательство дьыалатын миниистирэ Антон Сафронов социальнай ситимнэргэ суруйар.
Кэрэни уонна сырдыгы түстүүр дьоҕус бизнес саҥа эйгэтэ тыа сиригэр силис тардан эрэрэ хайҕаллаах суол. Кыраһыабай буолуу кииннэрэ улуус аайы элбии турдуннар!
Елена ПОТОЦКАЯ, «Саха сирэ», edersaas.ru
Хаартысканы Антон Сафронов фейсбугун сирэйиттэн ыллым.