Дьохсоҕоҥҥо тырахтарыыстар күрэхтэстилэр

Ааптар: 
Бөлөххө киир:

Бүгүн Таатта улууһун Дьохсоҕонугар ураты сэргэх күн буолла. Тырахтарыыстар долгуйа күүппүт күрэхтэһиилэрэ сарсыардаттан өрө көтөҕүллүүлээхтик, күргүөмнээхтик саҕаланна.


Быйылгы күөн күрэс «Победа» тыа хаһаайыстыбатын производственнай кэпэрэтиибэ төрүттэммитэ 25 сылынан уонна бастыҥ, үрдүк көрдөрүүлээх үлэлэринэн өрөспүүбүлүкэҕэ суон сураҕырбыт бырааттыы Саввиннар  ааттарыгар  Дьохсоҕон нэһилиэгин тырахтарыыстарын  икки ардыларыгар мас соһуутугар  улахан субуотунньук-күрэхтэһии ыытылынна. Санатан эттэххэ, тырахтарыыстар күрэхтэһиилэрэ үрдүк тэрээһиннээхтик ыытыллар буолбута хаһыс да сылыгар барда.

Бүгүҥҥү күрэхтэһии түмүгүнэн барыта 670 мас киллэриллибит. Бу мастар нэһилиэги тупсарыыга, бааһынаны күрүөлээһиҥҥэ туһаныллыахтаахтар.

Түмүккэ,  Иннокентий Саввин (куруусчута Михаил Тихонов) кыайыылааҕынан тахсыбыттар. Кинилэри тилэх үктэһэн  Петр Харайданов куруусчуттаах Дмитрий Степанов иккистээбит. Үһүс бириистээх миэстэҕэ Иван Гладкин көмөлөһөөччүтүнүүн Виктор Поповтуун тахсыбыттар. Саамай элбэх маһы биир соһууга киллэриигэ кыайыылааҕынан Дмитрий Степанов ааттаммыт.

Күрэхтэһиигэ бырааттыы Саввиннар оҕолоро-уруулара, «Победа» ТХПК, улуус, нэһилиэк дьаһалталара, биирдиилээн дьон бириистэри туруорбуттар. Эрбии тииһин курдук эгил-тэгил киирсиини көрбүт нэһилиэк олохтоохторо тэрээһинтэн улаханнык астынан тарҕаспыттар.

Сардаана БАСНАЕВА, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0