Бүддьүөккэ киирэр дохуот эбилиннэ

Бөлөххө киир:

Ил Түмэн уочараттаах пленарнай мунньаҕар бэҕэһээ алтынньы 18 күнүгэр норуодунай дьокутааттар өрөспүүбүлүкэ бүддьүөтүн үс сылга: 2018-2019-2020 сс.  бастакы ааҕыыга ылыннылар.

edersaas.ru

Бу сыл бүтүөр диэри судаарыстыбаннай бүддьүөккэ киирэр дохуот кээмэйэ 14 575 262,3 тыһ. үрдээн, барыллаан ааҕыынан, 208 526 511,9 тыһ. солк. тиийиэхтээх. Нолуок быһыытынан киирэр харчы 3 438 467,6 тыһ. солк. эмиэ эбиллэн, 104 672333,6 тыһ. солк. тэҥнэһиэҕэ.

Сокуон бырайыага тэрилтэлэр барыстарыттан тутуллар нолуок сууматын 41 394 301 тыһ. солк. 47 875 122 тыһ. солк. уларытарга этии киллэрдэ. Ол курдук, нолуок 6 480 821 тыһ. солк. тиийэ улаатыаҕа.

Сир баайын хостуурга нолуок кыччыаҕа

Акциз 3 332 190 тыһ. солк. 3 267 897 тыһ. солк. тиийэ аччыыра күүтүллэр. Сир баайын хостуурга тутуллар нолуок 2 979 871,6 тыһ. солк. кыччаан, 17 993 710 тыһ. солк. 15013 838 тыһ. солк. тиийэ намтыахтаах.

Судаарыстыбаннай пошлина 1 810,8 тыһ. солк. үрдээн, 217 376 тыһ. солк. 219 187 тыһ. солк. тиийиэҕэ.

Бүддьүөккэ киирэр нолуоктан атын дохуокка эмиэ кэккэ уларыйыы буолуоҕа.

Ороскуот эмиэ үрдээтэ

2018с. олохтоох бүддьүөт ороскуота 14 575 262 тыһ. солк. 210 231 538 тыһ. солк. тиийэ үрдүүр чинчилээх. 2019-2020 сс. ороскуот кээмэйэ уларыйыа суоҕа.

Быйыл уонна кэлэр икки сылга судаарыстыбаннай бырагыраамалары үбүлүүргэ эмиэ уларыйыы киириэҕэ.

2018 с. СӨ инвестиционнай бырагырааматын кээмэйэ  11 467,8 мөл. солк. ол иһигэр судаарыстыбаннай бүддьүөт үбэ 6916,3 мөл., федеральнай үп 2 943,4 мөл., онтон атын 1 608,2 тыһ. солк.

Бу үп-харчы көмөтүнэн 520 тыһ. кв. м. дьон олорор дьиэтэ, социальнай инфраструктура 66 эбийиэгэ, ол иһигэр 2385 миэстэлээх 11 оскуола, 3136 миэстэлээх 30 оҕо уһуйаана, эбии үөрэхтээһин 2 эбийиэгэ, идэ биэрэр орто анал үөрэхтээһин 1 эбийиэгэ, култуура 14 эбийиэгэ, доруобуйа харыстабылын 2 эбийиэгэ, спорт 5 эбийиэгэ, социальнай хааччыллыы 1 эбийиэгэ тутуллуоҕа.

Өрөспүүбүлүкэ инвестиционнай бырагырааматын кээмэйэ 2018 с. эбиллэн, 12 154,2 мөл. солк. тиийиэҕэ.

Бүддьүөт итэҕэһэ – 1,7 млрд  солк.  

Бу сылга судаарыстыбаннай бүддьүөт итэҕэһэ 1 705 026 тыһ. солк.

Бүддьүөккэ, үпкэ-харчыга, нолуок уонна сыана бэлиитикэтигэр, баайы бас билии уонна приватизациялааһын боппуруостарыгар Ил Түмэн сис кэмитиэтин бэрэссэдээтэлэ Юрий Николаев иһитиннэрбитинэн, сокуон бырайыага алтынньы 12 күнүгэр көрүллүбүт. Ол сокуон бырайыагын СӨ Счетнай балаатата, Ил Түмэн судаарыстыбаннай-правовой аппараата, СӨ РФ Юстицияҕа министиэристибэтин управлениета ылыммыттар. Сокуон бырайыага өрөспүүбүлүкэ парламенын бастайааннай кэмитиэттэрин бары мунньахтарыгар көрүллүбүт, онно 15 уларыйыы киирбит.

Үүт субсидиятыгар – эбии харчы

Тыа сиригэр олорор дьоҥҥо биир төһүү күүс быһыытынан, үүт субсидиятыгар 2018с. эбии 99 мөл. 580 тыһ. көрүллүбүт.

2018 с. судаарыстыбаннай бүддьүөтү чопчулуурга уонна 2019-2020 сс. былаанныырга норуодунай дьокутааттар сокуон барылын бастакы ааҕыытын ылыннылар. Иккис ааҕыыга сөбүлэһии хамыыһыйата үлэлэһиэҕэ, туох-ханнык уларыйыы киирбитин-киирбэтэҕин чуолкайдыахтара.

Марианна Тыртыкова, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0