Саха сирин астыыр-таҥастыыр тэрилтэлэрэ ааспыт нэдиэлэ бүтэһик күннэригэр ыытыллыбыт дойду таһымнаах “Көмүс күһүн” быыстапка-дьаарбаҥкаҕа, өрүү буоларыныы, ситиһиилээхтик кыттан эргилиннилэр. Ити эрээри, быйылгы ситиһиилэрэ хаһааҥҥытааҕар даҕаны баһырхай буолла: 35 кыһыл уонна 7 үрүҥ көмүс, 5 боруонса мэтээллэри кытта быыстапка муҥутуур бирииһинэн наҕараадаланнылар.
Москва куоракка 20-с төгүлүн ыытыллар үбүлүөйдээх “Көмүс күһүн” быыстапка-дьаарбаҥка кыһыл көмүһүгэр саха асчыттарыттан “Хоту” ТХПК (Мэҥэ Хаҥалас), “Чурапчы” ТХПК, “Өлүөхүмэ кыладабыайа” ХЭУо, “Түмэн” ТХПК (Дьокуускай), “Сахаагропродукт” ӨТХПХБК, “Туймаада-Агроснаб” ААУо, “Самартай” ТХПК, “Якутия” ҮХПХ, “Скиф” МПХ тигистилэр. Манна эбэн эттэххэ, “Чурапчы” кэпэрэтиип быйыл 6 кыһыл көмүс мэтээллээх, “Өлүөхүмэ кыладабыайа” ХЭУо бренд буолбут сырыгар уонна иккис кыһыл көмүһүн 1 гектартан ортотунан 575 центнер күөх үүнээйини хомуйбутун иһин ылла. Оттон быйылгы быыстапка муҥутуур рекордун Дьааҥыттан “Тымныы оройо” (“Полюс холода”) ТХПК олохтоото: 11 суол аһы туруорбута барыта кыһыл көмүһүнэн бэлиэтэннэ (тэрилтэ дириэктэрэ Екатерина Алексеевна Портнягина бүгүн сарсыарда Дьокуускайга көтөн кэлээтин кытта кэпсэппиппитин аллара ааҕыҥ).
Александр Атласов баһылыктаах Тыа хаһаайыстыбатын министиэристибэтэ тыа хаһаайыстыбатын потребительскай кэпэрээссийэтин тиһигин сайыннарыыга кылаатын иһин үрүҥ көмүс уонна тыа сирин бигэтик сайыннарыыга үрдүк түмүктэри ситиспитин иһин боруонса мэтээллэринэн наҕараадаланна. Маны тэҥэ тыа сирин сайыннарыыга көхтөөхтүк кыттыбыт II Малдьаҕар (Хаҥалас улууһа) уонна Маймаҕа (Нам улууһа) нэһилиэктэрэ быыстапка боруонса мэтээллэрин ыллылар. Тулагытааҕы агро-оскуола, Саха сиринээҕи ТХНЧИ, АПК сүбэлиир-иһитиннэрэр киинэ, Михал Павлов бааһынай хаһаайыстыбата (Хаҥалас) үбүлүөйдээх быыстапка араас дуйдаах мэтээллэрин туттулар.
Саха Өрөспүүбүлүкэтин астыыр-таҥастыыр тэрилтэлэрэ ити курдук ситиһиилээхтик кытыннылар. Биһиги асчыттарбыт быыстапка күннэригэр 8 туонна 200-чэ кэриҥэ суол бородууксуйаны туруорбуттара хамаҕатык атыыланна. Ил Дархан Айсен Николаев дойду саамай улахан аграрнай түһүлгэтигэр сылдьан, атын регионнары болҕойон көрдө-иһиттэ уонна өрөспүүбүлүкэ тыатын хаһаайыстыбатын табаарын оҥорооччулара инникитин хайдах дьаһаныахтарын-тэриниэхтэрин сөбүгэр бэйэтин баҕа санаатын эттэ.
Екатерина Портнягина, “Тымныы оройо” (“Полюс холода”) ТХПК дириэктэрэ:
-Биһиги эттэн уонна үүттэн астаныллар бородууксуйаҕа кытынныбыт. Сүрүннээн, убаһа уонна дьиэ табатын этиттэн астыыбыт. Холобур, ыыһаммыт убаһа ойоҕоһо, ыыһаммыт таба этэ. Үрүҥ астан – кымыс, быырпах. Барыта 11 суол бородууксуйанан кытынныбыт уонна барытыгар кыһыл көмүс мэтээли ыллыбыт.
Бу үрдүк ситиһиитинэн уонна Тыа сирин дьахталларын аан дойдутааҕы күнүнэн Екатерина Алексеевнаны истиҥник эҕэрдэлиибит!
Ыспыраапка
Верхоянскай куоракка олохтоох “Тымныы оройо” тыа хаһаайыстыбатын потребительскай кэпэрэтиибэ 65 бастайааннай үлэһиттээх, сайын нэһилиэктэргэ үүт тутар пууннары үлэлэтэр кэмигэр 100-тэн тахсар. Өрөспүүбүлүкэ хотугу эҥээригэр үүт тутар уонна ынах төбөтүгэр көмө харчы ылбат соҕотох улууска 1380 ыанньык үүтүн туталлар. Потребкэпэрэтиип иһинэн Верхоянскай куоракка “Алгыс” ТХПК 225 ынах сүөһүнү иитэриттэн ынаҕа – 120 төбө. “Тымныы оройо” ТХПК үүттэн-эттэн астыырын таһынан сайын ыраас ууну кутар итиэннэ иккис сылын балыктан астыыр.
Василий НИКИФОРОВ, «Саха сирэ» хаһыат, edersaas.ru