close
“Дойдубар сырдык ахтылҕаным”
Олох-дьаһах - Чараҥ

“Дойдубар сырдык ахтылҕаным”

Соторутааҕыта Чурапчы с. “Дойдубар сырдык ахтылҕаным” диэн бэрт сэргэх тэрээһин буолан ааста. Улуус киинигэр Хайахсыт с. төрүттээх, СӨ үтүөлээх юриһа, бочуоттаах меценат, Арассыыйа Суруйааччыларын, Суруналыыстарын сойуустарын чилиэнэ Александра Константинова-Дархаана ыалдьыттаата.

edersaas.ru

Александра Степановнаны эҕэрдэлии суруйааччылар Иван Мигалкин, Луиза Прокопьева-Уйулҕаана, Саргылана Гольдерова-Саргы Куо, Ираида Попова, Галина Нельбисова, Надежда Егорова-Намылы, Борис Горохов-Бээдьи Уола куораттан таҕыстылар. Кинилэр бу күн Чурапчы с. аатырбыт тренер Дмитрий Коркин төрөөбүтэ 90 сылын бэлиэтиир тэрээһин буола турарыгар түбэһэн, Чурапчытааҕы Физкультура уонна спорт институтун киэҥ уораҕайыгар уонна улуустааҕы киин бибилэтиэкэҕэ сырыттылар.

Эбиэт кэнниттэн Александра Степановна бар дьонун кытары көрсүһүүтэ улуус дьаһалтатын дьиэтигэр ыытылынна. Айар киэһэни РФ култууратын үтүөлээх үлэһитэ Мария Герасимова-Сэҥээрэ дириҥ ис хоһоонноохтук ыытта.

Дархаананы улуус баһылыга Андрей Ноговицын, баһылыгы социальнай үлэҕэ солбуйааччы Николай Аммосов, Хайахсыт с. баһылыгын солбуйааччы Герман Егоров, култуура улуустааҕы управлениетын салайааччы Дмитрий Попов, киин бибилэтиэкэ сэбиэдиссэйэ Вера Платонова уо.д.а. эҕэрдэлээтилэр. Кинилэр Дархаана айар үлэтинэн киэн тутталларын бэлиэтээн туран, инникитин даҕаны улууһун кытары сибээһин быспатыгар баҕардылар. Александра Степановнаны “Улуус олоҕор өҥөтүн иһин” III истиэпэннээх бочуотунай бэлиэнэн наҕараадалаатылар. Ону сэргэ Александра Степановна үөрэммит Хайахсыт оскуолатыгар, биир дойдулаахтарыгар дьиэ кэргэнинэн куруук көмөлөһөрүн, сүбэ-ама буоларын иһин истиҥник махтаннылар.

Норуодунай бэйиэт Иван Мигалкин СӨ уопсастыбаннай олоҕор кылааттарын иһин Сергей Васильев мөссүөннээх мэтээли Дархаанаҕа, Павел Федоровка-Сомоҕоҕо, Борис Гороховка-Бээдьи Уолугар туттарда уонна “Аҕам оттубут уота” хоһоонун аахта. Бэйиэт “Көһөрүллүү” диэн поэманы суруйа сылдьарын туһунан эппитин мустубут дьон махталларын ытыс тыаһынан биллэрдилэр. Дархаана прозатын “Полярная звезда” сурунаал эппиэттиир сэкирэтээрэ, суруйааччы Ираида Попова, оттон хоһооннорун поэтесса Саргы Куо ырытаннар, ааптар айар үлэтин киэҥник арыйдылар.

Бүгүҥҥү дьоро күҥҥэ эдьиийдэрин эҕэрдэлии кэлбит кыра бырааттара Василий Дьячковскай, Андрей Михайлов суруйааччы оҕо сааһын, кини литератураҕа хаһааҥҥыттан сыстыбытын уонна бииргэ төрөөбүттэригэр уҕараабат кыһамньытын долгуйа аҕыннылар.

Дархаана төрөөбүт дойдутугар ахтылҕанын, килбик иэйиитин хоһуйбут хоһооннорун С.Новгородов аатынан оскуола оҕолоро, улуустааҕы “Чурапчинка” дьахталлар түмсүүлэрэ, “Чурапчы” литературнай түмсүү, култуура исписэлиистэрэ уо.д.а. истиҥ иэйиилээхтик толордулар, ону сэргэ ааптар тылларыгар ылбаҕай ырыалар ылланнылар.

 

Суруйааччы Александра Константинова-Дархаана бу дьоро күнү киниэхэ бэлэхтээбит улууһун дьонугар, тэрийээччилэргэ, кини айар үлэтигэр сүгүрүйээччилэргэ ис сүрэҕиттэн махтанна уонна “Килбик иэйиим” диэн саҥа тахсыбыт кинигэтин бэлэхтээтэ.

Надежда ЕГОРОВА, «Саха сирэ» хаһыат, edersaas.ru

#бүгүн: 1
3
0

Сайт матырыйаалларын ааптар көҥүлэ суох ылар бобуллар.

Мин санаам:

2 × 3 =