Дьокуускай олохтоохторун Сайсары күөл тулатын тупсарар туһунан кэпсэтиигэ ыҥыраллар
Олунньу 14 күнүгэр киэҥ хабааннаах «Куорат сайдарыгар ыалдьар дьон» форум үлэтин саҕалыаҕа. Форумҥа Дьокуускай куорат сайдарыгар аналлаах боппуруостары ырытыахтара.
Форуму «Уопсастыбыннай куйаар» хайысха көхтөөх кыттааччылара арыйыахтара. Кинилэр Сайсары күөл тулата тупсарыгар анаан дизайн-бырайыак оҥорбуттар. Маны таһынан, кэпсэтиигэ «Консалтинговое бюро Стрелка» бырайыак ааптардара уонна дакылааччыктара кыттыыны ылыахтара.
Тэрийээччилэр Дьокуускай куорат сайдарын туһугар ыалдьар олохтоохтору тэрээһиҥҥэ кэлэн бэйэлэрин санааларын этэллэригэр ыҥыраллар. Уопсастыбыннай кэпсэтии киэһээ 17:00 чаастан Ярославскай аатынан уулусса 12/1 дьиэтигэр, «Сахаэкспоцентр» атыы-эргиэн киинигэр буолуоҕа. Олохтоохтор Ийэ скверэ, Сайсары күөл тулата уонна Лермонтов уулуссатын 115, 117, 119 дьиэлэрин таһа тупсарыгар этиилэрин киллэриэхтэрин сөп.
Николай Попов, «Саха сирэ» хаһыат, edersaas.ru