“Арассыыйа чулуу ааттара” аэропортарга биллиилээх дьон аатын биэрии куонкуруһа түмүктэннэ. Саха сиригэр бу куонкуруска барыта 59979 киһи кыттыбытыттан Былатыан Ойуунускайга 30810 куолас киирдэ.
edersaas.ru
Арассыыйа үрдүнэн барыта биэс мөлүйүөнтэн тахса киһи куонкуруска кытынна. Куонкуруска кыттыбыт 47 аэропортан 42-гэр дьон аата иҥэрилиннэ. Оттон хаалбыт биэс аэропортка (Архангельскайга, Нижневартовскайга, Санкт Петербурга, Внуковаҕа, Пензаҕа) иккис түһүмэх ыытыллыаҕа. Саамай көхтөөхтүк Минеральные Воды уонна Пенза олохтоохторо кытыннылар. Манна 410 уонна 404 тыһыынчаттан тахса киһи кытынна.
Оттон Саха сиригэр куонкуруска 59,9 тыһыынча киһи кытынна. Платон Ойуунускайга – 30810, Михаил Николаевка 15231 киһи куолаһын биэрдэ. Валерий Кузьмиҥҥа – 10812, Петр Бекетовка – 3126 киһи. Онон Ойуунускайга кыттааччылар 51 % куоластаан, Дьокуускай аэропордугар, куонкурус усулуобуйатынан, кини аата иҥэриллиэҕэ.
Аграфена КУЗЬМИНА, «Саха сирэ» хаһыат.