«Дорожная инспекция ОНФ/Карта убитых дорог» бырайыакка Дьокуускай олохтоохторо куоластаабыттарынан, киин куораппытыгар Хатыҥ Үрэх шоссета, Чайковскай, Маяковскай, Жорницкай, Петр Алексеев, Очиченко уулуссалара саамай куһаҕан туруктаахтар ахсааннарыгар киирдилэр. Бу уулуссалар хаһан өрөмүөннэниэхтэрэй?
Билигин бырайыак сайтыгар (dorogi-onf.ru) Дьокуускай мөлтөх туруктаах 42 уулуссата ыйыллан турар. Санатан эттэххэ, бу сайтка киирэн хас биирдии киһи ханна куһаҕан туруктаах суол баарын ыйыан сөп. Бырайыак суол кыһалҕатын быһаарыыга биир ситимнээхтик үлэлээһиҥҥэ болҕомтону хатыырга туһуланар.
Билигин Дьокуускай куорат дьаһалтата уулуссалары оҥорууга 2018-2022 с. былаан оҥорон бүтэрдэ. Бу былаанынан 74 эбийиэк саҥардыллыахтаах. Манна барытыгар 4,6 млрд солк. ирдэниллэр. Манна сыһыаран эттэххэ, билигин үбүлээһини көрөргө Ил Дархан ыйааҕа бэлэмнэниллэ сылдьар. Ыйаах бырайыагынан, Суол фондатыттан 2,8 млрд солк. көрүллүөхтээх.
Бу былаанынан куорат киин эрэ уулуссаларын буолбакка, Марха, Птицефабрика оройуоннарыгар, Пригороднайга, Маҕаҥҥа, Тулагыга, Хатаска, Табаҕаҕа, Севернай микро-оройуоҥҥа үлэлэр ыытыллыахтаахтар. Ону сэргэ, киин уулуссаларга массыына сырыытын арыый аҕыйатарга, Хатыҥ Үрэх уонна Окружной шосселары өрөмүөннүөхтээхтэр.
Оттон ити үөһэ ааттаммыт суоллар хаһан оҥоһуллуохтарай? Тырааныспар миниистирэ Семен Винокуров бэлиэтииринэн, Хатыҥ Үрэх шоссета быйылгыттан саҕалаан үс түһүмэҕинэн оҥоһуллуоҕа. Быйыл Жорницкай уулуссатын сэргэ Семен Данилов уулуссатыттан Курнатовскайга диэри өрөмүөннэниэҕэ.
Чайковскай уулуссатыгар өрөмүөн үлэтэ эһиилгиттэн саҕаланара күүтүллэр. Манна Бүлүү трассатыттан Кеша Алексеев уулуссатыгар диэри оҥоһуллуоҕа. Маяковскай уулуссата, хомойуох иһин, бу үөһэ этиллибит былааҥҥа кыайан киирбэккэ хаалла. “Быйыл өрөмүөн үлэтин чэрчитинэн, манна грейдердээһин, көннөрүү үлэтэ барыаҕа”, — диэн иһитиннэр Тырааныспар министиэристибэтэ.
Жорницкай уулуссата сорҕото билигин оҥоһулла сылдьар. Быйыл Семен Данилов уулуссатыттан Хатыҥ Үрэххэ диэри оҥоһуллуохтаах. Оттон эһиил Пирогов уулуссатыгар диэри ситэрэн биэриэхтэрэ. Петр Алексеев уулуссата эмиэ үс түһүмэҕинэн өрөмүөннэниэхтээх. Ол курдук, быйыл Лермонтов уулуссатыттан Пирогов уулуссатыгар диэри, эһиил – салгыы Семен Даниловка диэри, 2020 с. – Семен Даниловтан Окружной шоссеҕа диэри. Оттон Очиченко уулуссатыгар капитальнай өрөмүөнү 2021 с. ыытар былааннаахтар.
Аграфена КУЗЬМИНА, “Саха сирэ” хаһыат, edersaas.ru.