90-с сыллар иккис аҥаардарын саҕаланыытыгар Дьокуускайга “Кыайыы 50 сыла” Спорт дыбарыаһа үлэҕэ киирбитин сөҕө, астына, киэн тутта көрбүппүт. Онтон ыла киин куораппытыгар, улуустарга спорт эбийиэктэрин тутуу балысхан тэтиминэн барда. Кэлин сүүрбэччэ сылга, Дьокуускайга олоробун. Онон, куорат олохтооҕо буоларбынан, спорт эйгэтин суруйарбынан – олор тыыннаах туоһулара буолабын.
Ааспыт кэмҥэ Дьокуускайбытыгар “Эллэй Боотур” Муус дыбарыаһа, “Чолбон” бассейн, “Модун”, “Триумф”, “Дохсун” баараҕай спортивнай комплекстар тутулуннулар. Н.Н.Тарскай аатынан “Туймаада” стадион биллэ тупсарылынна. Бу эбийиэктэргэ аан дойду таһымнаах күрэхтэһиилэри ыытар кыах үөскээтэ. Олору сэргэ баар уонна саҥа оҕо спортивнай оскуолалара үлэлии тураллар.
Физкултууранан уонна спордунан дьарыктаныы чэгиэн-чэбдик, доруобай буолууга, бары ситиһиилэргэ, уһун үйэлэниигэ төрүт буоларын бары үчүгэйдик билэбит, өйдүүбүт.
Бу сыалы-соругу толорууга ахтыбыт спортивнай эбийиэктэрбит өрөспүүбүлүкэбит, бастатан туран, Дьокуускай олохтоохторун туһугар тигинэччи үлэлииллэр. Киин куораппытыгар физкултууранан дьарыктанааччы элбээбитэ харахха быраҕыллар. Дьокуускайбыт бары спортивнай эбийиэктэригэр, болуоссаттарга, стадионнарга, пааркаҕа араас хамсаныыларынан эрчиллэр, хаамар, сүүрэр дьону сылы эргиччи көрөбүт.
Туох барыта көҕүлүүр, тэрийэр дьонтон тутулуктаах. Куорат, уокуруктар баһылыктара, дьаһалталара бу үлэни харах далыгар туталлара үөрүүлээх, тус холобурдарын көрдөрөллөрө хайҕаллаах. Куорат, уокуруктар дьаһалталарыгар ГТО нуорматын туттарыы, спорт элбэх көрүҥнэригэр күрэхтэһиилэр былааннаахтык ыытыллаллар. Манна бастакы салайааччылар инники күөҥҥэ сылдьаллар, баһылыыр-көһүлүүр оруолу ылаллар. Ол курдук, куорат дьаһалтатын баһылыга Айсен Николаев өрөспүүбүлүкэҕэ ат спордун уонна Дьокуускай тустууга федерацияларын бэрэсидьиэнинэн, куорат дьокутааттарын мунньаҕын бэрэссэдээтэлэ Александр Саввинов СӨ волейболга федерациятын бастакы вице-бэрэсидьиэнинэн, куорат дьаһалтатын баһылыгын бастакы солбуйааччы Дмитрий Садовников Дьокуускай тустууга федерациятын бэрэсидьиэнин солбуйааччынан, баһылыгы солбуйааччы Евдокия Евсикова черлидиҥҥэ уонна керлиҥҥэ Россия Саха сиринээҕи салаатын салайааччынан, баһылыгы солбуйааччы Георгий Михайлов куорат автомобилга уонна мотоциклга спордун федерациятын бэрэсидьиэнинэн үлэлииллэр. Бэртээхэй холобур!
Дьокуускайбытыгар физкултуура уонна спорт өссө күүскэ сайдарыгар эрэл улахан.
Николай РЕБРОВ, суруналыыс, СӨ спордун бэтэрээнэ.