Дьокуускай куоракка сахалыы үөрэтэр кылаастар, бөлөхтөр эбиллэ тураллар
Билигин Россияҕа үөрэхтээһин сүрүн хайысхаларын ис хоһоонун тула араас кэпсэтиилэр, сыанабыллар, аһара баран аһаҕас мөккүөрдэр бара тураллар. Олор бары үөрэхтээһин билиҥҥи туругуттан, хаачыстыбатыттан, түмүгүттэн астыммат буолууттан тахсаллар дии саныыбын.
Николай РЕБРОВ, Дьокуускай. edersaas.ru анаан.
Россия элбэх омуктар холбоһууларыттан турар судаарыстыба. Ол иһин, ахтыбыт кыһалҕаларым национальнай өрөспүүбүлүкэлэргэ бэйэлэрин уратыларын учуоттаан туран, ордук сытыытык көстөллөр.
Мин биэнсийэлээхпин, үлэлээбэппин. Дьокуускай куорат олохтооҕобун. Ол эрээри, үөрэхпинэн, идэбинэн учуутал буоларбынан, сааһым тухары үөрэхтээһини кытта сибээстээх эйгэлэргэ үлэлээбиппинэн, билигин сиэннэрим куорат араас үөрэхтэрин кыһаларыгар үөрэнэллэринэн, этэргэ дылы, үөрэхтээһини хараҕым далыгар тутарга кыһанабын, дьулуһабын, суруналыыс быһыытынан бу тиэмэҕэ элбэхтэ суруйабын, хас да кинигэлэрдээхпин.
Биллэн турар, үөрэхтээһини киэҥник, дириҥник, ырытан суруйуу мин кыаҕым таһынан дьыала, оннук сыал-сорук туруоруммаппын даҕаны. Онон, саастаах киһи сиэринэн, тэҥнэбилгэ олоҕуран, үөрэхтээһин чопчу биир боппуруоһугар санаабын этэргэ холонуум.
Урукку кэмҥэ Дьокуускай төрүт олохтоох сахата, оройуоннартан кэлбит саха оҕото, орто оскуолаҕа төрөөбүт тылынан куорат 2-с нүөмэрдээх оскуолатыгар эрэ үөрэнэр кыахтааҕын туһунан биир бигэ өйдөбүл баара. Кырдьык да оннук этэ, элбэх саха саарына бу үөрэх кыһатыгар үөрэммитин билэбит.
Саҥа кэмҥэ балаһыанньа тосту уларыйда. Бу дьоҕус суруйуубунан киин куораппытыгар саха оҕотун төрөөбүт тылынан үөрэтии боппуруоһа төрдүттэн, бүтэһиктээхтик быһаарылынна диэбэппин. Ол эрээри бу хайысхаҕа үтүө өттүгэр биллэр уларыйыылар тахсыбыттарын хайдах да мэлдьэһэр сатаммат.
Этэргэ дылы, “Москуба биирдэ тутуллубатаҕа”, уларыйыылар үтүө эрэмньини үөскэтэллэр. Ыраата барбакка, Дьокуускайбытыгар кэлин биэс сылга бу хайысхаҕа туох үлэ барбытыгар чопчу түмүктэргэ тохтуоҕуҥ.
2012 сыллаахха Дьокуускайга саха тылын үөрэтэр оскуолалар уонна оҕо саадтарын ситимнэригэр сайдыы кэлим былаана бигэргэтиллибитэ. Куорат дьаһалтата (баһылык А.Николаев), дьаһалта үөрэхтээһиҥҥэ управлениета (начаалынньык В.Петров) бу былаан олоххо киириитигэр ааспыт биэс сылга элбэх өрүттээх үлэни ыыттылар, үтүө түмүктэр баар буоллулар. Ол курдук, ааспыт кэмҥэ куорат 27 муниципальнай оскуолаларыгар саха тылын уонна литэрэтиирэтин үөрэтэр саҥа 85 кылаас арылынна. Билигин куоракка уонна куорат тулатыгар 5 национальнай оҕо саада: «Кэскил», Тулагыга 4-с нүөмэрдээх, “Кэрэчээнэ”, “Мичээр”, “Ромашка” үлэлииллэр, ону таһынан куорат 27 оҕо саадыгар 119 бөлөххө 3990 оҕону хабан иитии-үөрэтии сахалыы ыытыллар.
Аҥардас 2016 сылга оҕо саадтарыгар сахалыы тыллаах 8 бөлөх арылынна. Куорат дьаһалтата бу хайысханан үлэни күүскэ ыытар былааннааҕа хайҕаллаах.
Николай РЕБРОВ, Дьокуускай куорат олохтооҕо, СӨ бочуоттаах бэтэрээнэ.
Дьокуускай, edersaas.ru