Дьокуускай куорат киин оскуолаларыгар кылаастар бары кэриэтэ аһары туолан тураллар. Ил Дархан э.т. Айсен Николаев бэлиэтииринэн, бу киин куорат социальнай биир улахан кыһалҕата.
Ил Дархан э.т. Айсен Николаев бу күннэргэ Дьокуускай куорат тутулла турар саҥа оскуолаларын, ону сэргэ элбэх оҕолоох оскуолаларга сыһыарыллыбыт эбии эбийиэктэри көрдө. Бастатан туран, 203-с микро-оройуоҥҥа тутулла турар “Айыы кыһатын” эбийиэгэр сырытта. Бу оскуола быйыл кыһын үлэҕэ киириэхтээх. Ону сэргэ, 203-с оройуон 8-с нүөмэрдээх куорпуһугар 33 нүөмэрдээх орто оскуола эбии кылаастара арыллыахтара. Билигин өрөмүөн үлэтэ бара турар. Маны таһынан, манна эһиил өссө биир оскуола тутуллуоҕа. Бу туһунан Айсен Николаев эбийиэктэри көрүү кэмигэр бэлиэтээтэ.
Дьокуускайга “Айыы кыһатын” таһынан 6-с, 25-с оскуолалар тутулла тураллар. Быйыл эбийиэктэр үлэҕэ киириэхтээхтэр. Онон икки сиринэн тутааччылар түүннэри-күнүстэри үлэлииллэр.
Оттон эбии кылаастары арыйыы туһунан эттэххэ, Үп министиэристибэтин урукку дьиэтигэр Киров аатынан уулуссаҕа турар Н.Алексеева аатынан Техническэй лиссиэй өрөмүөнэ бүтэн эрэр. Бу лиссиэйгэ аны күһүҥҥүттэн 17-с оскуола алын сүһүөх кылаастара эбии киирэн биэриэхтэрэ. Оттон 5-с нүөмэрдээх оскуола сорох үөрэнээччилэрэ 2019 с. Толстой уулуссатын 20 дьиэтигэр көһөн биэриэхтэрэ. Манна сыһыаран Айсен Сергеевич бу дьиэни уталыппакка оҥоро охсор наадатын туһунан иһитиннэрдэ.
Тутуулары, эбийиэктэри кэрийэн баран, Айсен Николаев: “Киин куорат салалтата оскуолалары бэрээдэктээһиҥҥэ үлэлэһэр. Өрөспүүбүлүкэ өттүттэн көмө эмиэ баар. Холобур, билигин Техническэй лиссиэй дьиэтэ өрөмүөннэнэн бүтэн эрэр. Манна 17-с оскуола эбии кылаастара арыллыахтара. Оччотугар оскуола өрө тыына түһүө этэ. Кэнэҕэскитин Дьокуускай куорат салалтатын кытары оскуолаларга эбии миэстэ таһаарыытыгар улахан болҕомто ууруллара наадалаах. Ол курдук, саҥа эбийиэктэри ылан, өрөспүүбүлүкэ, куорат суотугар сылдьар тутуулары үөрэнэргэ анаан бырайыактаан, саҥа оскуолалары тутан баар кыһалҕаны туоратыы үлэтэ ыытыллыахтаах. Биир кылааска 40-тан тахса оҕо үөрэниэ суохтаах. Бу киин куорат биир улахан кыһалҕата”, — диэн бэлиэтээтэ.
Аграфена КУЗЬМИНА, “Саха сирэ” хаһыат, edersaas.ru