Дьокуускай пааркатыгар саҥа аттракцион үлэлээтэ

Бөлөххө киир:

Киин куорат олохтоохторугар, оҕолоругар уонна ыалдьыттарыгар бу бээтинсэҕэ  бэлиэ күн тосхойдо. Култуура уонна сынньалаҥ пааркатыгар 40 миэтэрэлээх, саамай улахан,  “колесо обозрения” диэн ааттанар саҥа аттракцион аһылынна.


Үөрүүлээх тэрээһиҥҥэ СӨ Баһылыгын эбээһинэһин быстах кэмҥэ толорооччу Айсен Николаев, Дьокуускай куорат баһылыгын э.т. Дмитрий Садовников, Дьокуускай куорат Дууматын бэрэссэдээтэлэ Александр Саввинов, “Туймаада-паарк” ХЭТ инвестиционнай бырайыак салайааччыта, “Чолбон” ААУо генеральнай дириэктэрэ Альберт Семенов, “Берегиня” оҕо дьиэтин иитиллээччилэрэ, үлэһиттэрэ, Дьокуускай элбэх оҕолоох дьиэ кэргэттэрэ уонна куорат олохтоохторо кытыннылар.

Саҥа аттракцион аһыллыытынан мустубут дьону эҕэрдэлээн туран:

—Бу бырайыак биһиги куораппытыгар, олохтоохторго, оҕолорбутугар олус наадалаах. Куорат мэринэн олорон бу боппуруоска үлэни ыыппытым. Туох барыта сайдыахтаах, тупсуохтаах. Урукку эргэрдэ, оттон бу саҥа аттракцион быдан улахан, тупсаҕай. Чааһынай бизнес инвестицияларын көмөтүнэн биһиги пааркабыт өссө сайдыаҕа уонна куорат олохтоохторун, ыалдьыттарын, оҕолорбут саамай сөбүлээн сынньанар сирдэринэн буолуоҕа. Бука барыгытын эҕэрдэлиибин!, — диэтэ Айсен Николаев.

Дьокуускай Сайсарытын олохтооҕо Вилюяна Томская элбэх оҕолоох дьиэ кэргэттэр ааттарыттан Айсен Сергеевичка, куорат салалтатыгар, оҕолорго кыһамньыларын иһин махталын биллэрдэ.

Кыһыл лиэнтэ быһылларын кытта, саҥа аттракциоҥҥа бастакынан, биллэн турар, оҕолор киирэн олордулар.

Дьэ мантан ыла, уотунан-күөһүнэн киэркэйбит саҥа аттракционтан — 40 миэтэрэ үрдүктэн биһиги тапталлаах Дьокуускайбытын ыраахха диэри дуоһуйа көрүөхпүт турдаҕа!

Эргэ аттракциоммут 35 сыл устата эрэллээхтик сулууспалаан баран, этэргэ дылы, “бочуоттаах сынньалаҥҥа” бардаҕа. Оттон саҥа аттракцион 18 кабинкалаах, онно 108 киһи киириэн сөп. Сорох кабинкалар сылытыллар буоланнар, 30 да кыраадыс тымныыга үөрэ-көтө хатааһылыахха сөп.

Татьяна МАРКОВА.

Мария ВАСИЛЬЕВА хаартыскаҕа түһэриилэрэ.

+1
0
+1
0
+1
0
+1
0
+1
0
+1
0
+1
0