Дьокуускай куорат федеральнай суута сыл бастакы аҥаарынааҕы үлэтин түмүгүн ырытыспытын туһунан бу суут пресс-сулууспата иһитиннэрдэ.
Бу ыйыллар кэмҥэ киин куорат суутун судьуйаларын көрүүтүгэр 893 холуобунай дьыала сылдьыбыт (ааспыт 2016 сыл 6 ыйыгар – 798).
Барыта 569 киһи сууттаммытыттан, 507 буруйдуур бириигэбэр, биир киһиэхэ быыһыыр бириигэбэр (былырыын эмиэ биир) тахсыбыт.
125 сууттанааччыга туһуланан, холуобунай дьыаланы сабар туһунан 119 уураах тахсыбыт. Оттон күһэлэҥ эмтээһиҥҥэ 6 киһи ууруллубут.
Накаастабыл миэрэлэри ылан көрдөххө; 203 киһи көҥүлэ быһыллыбыт (2016 с. 6 ыйыгар – 197 этэ), 284 киһи усулуобунай миэрэнэн сууттаммыт (былырыын баччаҕа – 286 этэ), 31 киһи ыстарааптаммыт, 31 киһи көннөрүнэр уонна булгуччулаах үлэҕэ ууруллубут.
Дьокуускай куоракка сууттаммыт дьонтон 273 киһи (47,9% ) буруйу арыгы иһэн баран оҥорбут, 376 киһи (66%) ханна да үлэлээбэт эбит. Маны таһынан, 12 омук гражданина уонна гражданствота суох дьон сууттаммыт (2,1%).
Сыл бастакы аҥаарыгар көрүллүбүт 680 холуобунай дьыалаттан баһыйар ахсааны уоруу (267 дьыала биитэр 39%), наркотикка сыһыаннаах (98 дьыала биитэр 14,4%) итиэннэ халааһын (54 дьыала биитэр 7,9%) ылаллар.
Оттон өлөрүү дьыалата 1,3%-нан, доруобуйаҕа орто уонна ыарахан эмсэҕэлээһини оҥоруу — 4,5%-нан, халааһын — 3,1%-нан уонна наркотикка сыһыаннаах дьыалалар 2,1%-нан аҕыйаабыттар.
Ол оннугар киһи половой көҥүлүгэр туһуламмыт дьыалалар 1,5 %-нан, уоруу — 10%-нан уонна түөкүннээһин — 1%-нан элбээбиттэр.
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн.