Дьокуускай урбаанньыттара «Оҕоҕун оскуолаҕа бэлэмнээ» аахсыйаны тэрийэн ыыттылар
Үтүө санаа сылынан Дьокуускайга урбаанньыттар оҕону оскуолаҕа бэлэмнииргэ аахсыйа ыыттылар. Бу туһунан куорат дьаһалтатыттан уопсастыбаннаһы, иһитиннэрэр-биллэрэр маассабай сириэстибэлэри кытары үлэҕэ Департаменыттан иһитиннэрдилэр.
Саҥа үөрэх дьылын көрсө урбаанньыттар быйыл 39 оҕоҕо көмөлөстүлэр. Бэлэхтэрин сыл ахсын Комсомол болуоссатыгар ыытыллар «Оскуола баһаарыгар» туттардылар.
—Урбаанньыттар Үтүө санаа сылынан маннык аахсыйаны ыытыахха диэн бэйэлэрэ көҕүлээн, улаханнык үөртүлэр. Кимиэхэ бэлэх оҥорорго сокуоннай саастарын ситэ илик оҕолор дьыалаларыгар Хамыыһыйа испииһэк биэрэн көмөлөстө. Бэлэххэ атах таҥаһа, оскуолаҕа кэтэргэ таҥас-сап, суумка, үөрэнэр тээбирин баар. Бу наһаа туһалаах тэрээһин. Түгэнинэн туһанан, көхтөөхтүк кыттыбыт дьоммутугар барыларыгар махтанабыт. Чуолаан, урбаанньыт Алексей Носовка, туох баар болҕомтотун ууран бу боппуруоһунан ылсан дьарыктаммытыгар, хамсааһыны сүрүннээбитигэр улахан махталбытын тиэрдэбит, — диэтэ Дьокуускай куорат Урбааҥҥа, туризмы сайыннарыыга уонна тырааныспарга департаменын начаалынньыга Ирина Гаргач.
—Сокуоннай саастарын ситэ илик оҕолор дьыалаларыгар профилактическай учуокка турар дьиэ кэргэттэр аахсыйаҕа кытыннылар. Бу үксүн хастыы да үөрэнээччилээх дьиэ кэргэттэр. Испииһэккэ алын сүһүөх кылааска үөрэнэр оҕолор хабылыннылар, — диир «Якутское» ИДьМ ММУ полиция майора Александра Баранова.
—Дьаарбаҥка саҕаланна да, урбаанньыттар аахсыйаны хаһан оҥоробут диэн ыйыппытынан бараллар. Таҥаһы-сабы, оонньууру, үөрэх тээбиринин үөрэ-көтө аҕалаллар. Быйыл хас биирдии бэлэххэ оскуолаҕа кэтэр таҥас-сап, көстүүм, атах таҥаһа, бартыбыал баар буоларыгар кыһалынныбыт. Таҥаспыт-саппыт барыта сөп буоларын курдук болҕомтобутун уурдубут. Барыта үчүгэй, хаачыстыбалаах буоллун диэн, туох баарын барытын түөрт күн устатыгар кэрийэн көрө сылдьан талан ыллым. Үтүө санаалаах кэллиэгэлэрбинэн киэн туттабын уонна кинилэргэ махтанабын, — диэн «Оскуола баһаара» дьаарбаҥканы салайар Алексей Носов кэпсээтэ.