Сэтинньи 2 күнүгэр «Дьокуускайдааҕы өрүс порда» уонна «Старвей» хампаанньалар холбоһор дуогабардарыгар илии баттанна. Онон «Дьокуускайдааҕы өрүс порда» атын бас билээччилэннэ.
edersaas.ru
Экспертэр этэллэринэн уонна саҥа хаһаайын сабаҕалааһынынан, икки улахан хампаанньа баайдарын-дуолларын, үптэрин-харчыларын биир сиргэ түмүүлэрэ Иркутскай уобаласка уонна Саха Өрөспүүбүлүкэтигэр өрүс тырааныспара сайдыытыгар улахан төһүү күүһүнэн буолуоҕа. Уунан таһаҕаһы тиэйии түргэтиэ, өрүһүнэн сырыы табыгастаах буолуоҕа. Ол эрээри салалта кэҥээбитинэн сибээстээн, уунан сырыыга уларыйыылар тахсыахтарын сөп. «СӨ Тырааныспарын уонна суол хаһаайыстыбатын министиэристибэтин өттүттэн өйөбүл суох буоллаҕына, пассажирдары таһыыга харгыстар үөскүөхтэрин, маршруттар тохтотуллуохтарын сөп,»- диэн «Дьокуускайдааҕы өрүс порда» хампаанньа дириэктэрэ Радий Васильев бэлиэтээн эттэ. Ол курдук, «хампаанньаҕа үп киллэрбэт маршруттарынан» Дьокуускай — Алдан, Дьокуускай — Эдьигээн уонна Дьокуускай — Өлүөхүмэ маршруттар буолаллар. Аллараа Бэстээххэ туорааһын киирсибэт.
Владимир Кожокарь, «Старвей» хампаанньалар бөлөхтөрүн дириэктэрэ:
— Хампаанньаларбыт холбоспуттарын түмүгэр Өлүөнэ өрүһүнэн навигация табыгастаахтык барыаҕа. Маннааҕы өрүс тырааныспарынан дьарыгырар кыра уонна орто тэрилтэлэри кытта ыкса үлэлэстэхпитинэ, дьон-сэргэ уу айанынан туһанарыгар барыстаах буолуоҕа.
Хаартыска: интэриниэттэн.
Николай Попов, «Саха сирэ» хаһыат, edersaas.ru
«Дьокуускайдааҕы өрүс порда» иркутскайдар илиилэригэр киирдэ