Тохсунньу 20 күнүттэн Дьокуускай куорат оскуолаларыгар 2018-2019 үөрэх дьылыгар 1 кылааска сурутуу http://edu.e-yakutia.ru порталга саҕаланыаҕа. Электроннай уочарат оскуолаларынан тус-туспа тохсунньу 20 уонна 27 күннэриттэн ыытыллыаҕа. Ити туһунан СӨ сибээскэ уонна информационнай технологияҕа министиэристибэтин пресс-сулууспата иһитиннэрэр.
edersaas.ru
Төрөппүт электроннай сайабылыанньа биэрэригэр Идентификация уонна аутентификация биир кэлим систиэмэтигэр (ЕСИА) суруйтарбыт буолуохтаах. ЕСИА регистрацияны www.e-yakutia.ru эбэтэр www.gosuslugi.ru порталга ааһыахха сөп.
“Былырыын сурутуу бастакы 15 мүнүүтэтигэр 350-ча сайабылыанньа киирбитэ. Уочарат сайабылыанньа хаһан бэриллибит күнүнэн уонна бириэмэтинэн быһаарыллыаҕа. Салгыы сайабылыанньа биэрбит киһиэхэ 14 күн иһинэн докумуоннарын оскуолаҕа хаһыс чыыһылаҕа илдьэн биэрэллэрин туһунан электроннай почталарыгар эбэтэр СМС иһитиннэрии кэлиэҕэ”, — диэн миниистири бастакы солбуйааччы Николай Гришаев быһаарда.
Тохсунньу 20 күнүгэр сарсыарда 9 ч 00 мүн. бу оскуолаларга сурутуу саҕаланыаҕа: Дьокуускай куорат 1-кы, 16-с, 17-с, 31-с №-дээх оскуолаларыгар, Н.О.Кривошапкин аатынан 5-с, Л.А.Колосова аатынан 33-с №-дээх оскуолаларга, Куорат классическай гимназиятыгар, Саха политехническэй лиссиэйгэ, Дьокуускай куорат национальнай гимназиятыгар (“Айыы кыһата” эбии кылаастарын киллэрэн туран), Саха гимназиятыгар, Саха-корейскай оскуолаҕа.
Тохсунньу 27 күнүгэр сурутуу барыаҕа: 2-с, 3-с, 6-с, 7-с, М.И.Кершенгольц аатынан 9-с, Д.Г.Новопашин аатынан 10-с, 12-с, 13-с, 15-с, 18-с, 19-с, Сэбиэскэй Сойуус дьоруойа Ф.К.Попов аатынан 20-с, 21-с, 23-с, С.И.Климаков аатынан 24-с, 25-с, 26-с, 27-с, 29-с, В.И.Кузьмин аатынан 30-с, 32-с, “Надежда” 36-с, 38-с, Марха 1-кы, Марха 2-с нүөмэрдээх, П.С.Хромов аатынан Кангалас, Табаҕа, Тулагы, П.Н. уонна Н.Е.Самсоновтар ааттарынан Хатас, Маган оскуолаларыгар.
Маҥнайгы кылааска сурутуу олорор сир регистрациятынан эбэтэр 2018 сыл от ыйын 1 күнүгэр диэри ханна олорорунан ыытыллар. Электроннай сайабылыанньаны биэрбэтэх төрөппүттэр олунньу 1 күнүттэн оскуолаларга тиийэн суруйтарыахтарын сөп.
“Саха сирэ” хаһыат, edersaas.ru
Хаартыска интэриниэттэн.