АПК үлэһиттэрин бырааһынньыгын чэрчитинэн, бу күннэргэ киин куорат дьаһалтатын тэрийиитинэн түөрт сиринэн: Орджоникидзе, Доҕордоһуу уонна Кыайыы болуоссаттарынан, Өксөкүлээх аатынан Норуоттар доҕордоһууларын дьиэтин тиэргэнигэр тыа хаһаайыстыбатын дьаарбаҥката буолар.
Бээтинсэттэн саҕалаан чугастааҕы бөһүөлэктэр итиэннэ чугас улуустар хаһаайыстыбалара оҕуруот аһын, эти, үрүҥ аһы, мүөтү сир аһын арааһын куорат олохтоохторун иннилэригэр ырыынак сыанатынан удамырдык тардан кэбистилэр. Тигээйи иитиитинэн иитиитинэн 1984 сылтан дьарыктанар Анатолий Гаевой икки көрүҥ мүөтү, Матрена Портнягина уһаайбатыгар үүннэрбит дьэдьэнин барыанньатын аҕалбыттар, «Эм» бааһынай хаһаайыстыбата хаппыыстатын киилэтин 15-20 солк. атыылаата. Маннык тэрээһиннэргэ көхтөөхтүк кыттар «Хатастааҕы сибиинньэ комплекса», «Дьокуускайдааҕы көтөр фабриката» ААУо-лар, «Сахаагропродукт» кэпэрэтиип, Уус Алдан, Мэҥэ Хаҥалас, Чурапчы, Нам, Амма улуустарын хаһаайыстыбалара бу да сырыыга астара-үөллэрэ баһаам.
Кыайыы болуоссатыгар балык хаһаайыстыбалара тураллар. Ыраах Эдьигээн улууһуттан аҕалыллыбыт сибиэһэй уомул уонна искэх төрүт былдьаһыгынан барар. «Хотугу сулус» аҕа ууһун общинатын бэрэссэдээтэлэ Тамара Ксенофонтова ааспыт «Ас-үөл – 2017» өрөспүүбүлүкэтээҕи быыстапка-дьаарбаҥкаҕа балыкпыт үчүгэйдик атыыламмыта, ол иһин бу сырыыга өссө элбэҕи аҕаллыбыт диэн кэпсиир.
Елена Горохова, тыа хаһаайыстыбатын куораттааҕы управлениетын исписэлииһэ:
— Куорат да иһиттэн, чугас улуустартан даҕаны элбэх хаһаайыстыба сайаапка түһэрбитин иһин дьаарбаҥканы хас да сиринэн итиэннэ элбэх киһи сырыттын, кыстыыр аһын хааччыннын диэммит, үс толору күн – бээтинсэттэн саҕалаан өрөбүлгэ диэри – тэрийдибит.
Туймаада эбэ хотун болуоссаттарыгар атыы-эргиэн оргуйан олорор, ол быыһыгар уус-уран самодеятельность кэнсиэрдэ буолар. Холобур, Мархаттан «Зоренька» бэтэрээннэр кулууптарын кыттыылаахтара ырыа-үҥкүү кэһиилээх кэлбиттэр. Үлэ дьонун уруйдаабыт курдук, күн-дьыл да туран биэрдэ.
Раиса Сибирякова, “Саха сирэ” хаһыат, edersaas.ru .