Дьокуускайга аатырбыт снайпер Иван Кульбертинов өйдөбүнньүгэ туруоруллуоҕа
Быйыл сэтинньи 7 күнүгэр Саха сирэ уһулуччулаах уола Иван Николаевич Кульбертинов төрөөбүтэ 100 сылын бэлиэтиэҕэ. Соторутааҕыта “Биир ньыгыл Арассыыйа” баартыйа бэрэссэдээтэлэ Д.А. Медведев регионнааҕы Уопсастыбаннай приемнайыгар Өлүөхүмэ улууһун уонна Саха сирин эбэҥкилэрин землячестволарын бэрэстэбиитэллэрэ Иван Кульбертинов сырдык аатын үйэтитиигэ көмө буолалларыгар көрдөһүүлээх киирэ сырыттылар.
Роман ПОПОВ, “Саха сирэ” хаһыат, edersaas.ru
Билигин Дьокуускай куорат дьаһалтатыгар Кульбертинов аатын ДСК оройуонун биир уулуссатыгар иҥэрэр туһунан боппуруос көрүллэ сылдьар. Тэрийээччилэр санааларынан, онно Иван Николаевичка өйдөбүнньүк туруоруллуоҕа. И.Н. Кульбертинов өйдөбүнньүгүн комплексын бастыҥ эскиһигэр өрөспүүбүлүкэтээҕи куонкурус биллэрилиннэ. Өйдөбүнньүгү скульптор Александр Дьячковскай оҥоруоҕа.
Саха Өрөспүүбүлүкэтин Ил Дархана Егор Борисов дойду салалтатыгар аатырбыт снайпер сырдык аатын үйэтитэр туһунан боппуруоһу хаста да көтөхпүтэ, Иван Кульбертиновка Арассыыйа Дьоруойун үрдүк аатын иҥэрэр туһунан икки ыҥырыы суругу ыыппыта. Саха Өрөспүүбүлүкэтин бырабыыталыстыбатын бэрэссэдээтэлэ Михаил Гуляев салайааччылаах үбүлүөйдээх тэрээһини ыытар өрөспүүбүлүкэтээҕи хамыыһыйа көмөтүнэн Иван Николаевич аймахтара, биир дойдулаахтара РФ оборонатын Киин архыыбыгар тиийэн салгыы үлэлэһэр санаалаахтар.
“Биир ньыгыл Арассыыйа” баартыйа бэрэссэдээтэлэ Д.А. Медведев регионнааҕы Уопсастыбаннай приемнайын салайааччы, Ил Түмэн дьокутаата Елена Голомарева баартыйа улуустардааҕы приемнайдара Иван Николаевич өйдөбүнньүгүн оҥорууга үп хомуйуутун көҕүлүөхтэрэ диэтэ. Үбүнэн көмөлөспүттэр, меценаттар ааттара сквергэ туруоруллуохтаах Бочуот дуоскатыгар киллэриллиэхтэрэ.
“Өрөспүүбүлүкэ уопсастыбаннаһын, бары олохтоохторун Иван Кульбертинов өйдөбүнньүгүн оҥорууга үбү хомуйууга көмө-тирэх буолалларыгар ыҥырабын. “Ким да умнуллубат, туох да умнуллубат” диэн тыллары дьиҥ дьыаланан бигэргэтиэҕиҥ, номох буолбут снайперы, эбэҥки норуотун чулуу уолун сырдык аатын төрөөбүтэ 100 сылыгар үйэлэргэ үйэтитиэҕиҥ”, — диэтэ Елена Голомарева.
Achtung, Kulbert! Саха улуу снайпердара
Роман ПОПОВ, “Саха сирэ” хаһыат, edersaas.ru