Дьокуускай куорат 202 микрооройуонугар пластик бытыылкаларын туспа угар 11 анал иһит туруорулунна. Бу бытыылкалары кэлин хос уулларан оҥорорго туһаныахтара. Кэлин хортуоҥҥа аналлаах иһиттэри туруорар былааннаахтар.
Саҥа саҕалааһыҥҥа урбаанньыт Евгений Петров ылсыста. Кини уртууттаах лаампалары уонна быраҕыллыбыт, кутталлаах медицинскэй, химическэй эттиктэри суох гынар тэрилтэлээх.
Куорат олохтоохторо аҥаардас пластик бытыылкатынан анал бөх иһитин толордохторуна, баазаларыгар илдьэн, өҥүнэн араартаан баран, тиэйэргэ-таһарга табыгастаах буоллун диэн ыга баттаталлар. Онтон Хабаровскайга массыынанан тиэйэн илдьэллэр. Онно бөҕү арааран, уулларан, саҥа бородууксуйаны хат оҥорон таһаарар үс собуот баар. Холобур, Евгений хортуон хоруопкалары, кумааҕыны ыга баттатан, баайан баран, ый устата 60 туонна кэриҥэ бөҕү илдьэр эбит. Хортуону үксүгэр дуогабардаспыт тэрилтэлэрэ аҕалаллар.
Сайдыылаах дойдуларга өстүөкүлэҕэ, пластикка, кумааҕыга, салаппааҥҥа, ас тобоҕор тус-туспа бөх тоҕор иһиттэр тураллар. Бөҕү арааран тоҕортон ким да сүрэҕэлдьээбэт, тоҕо диэтэр, уонунан сылларга оннукка үөрэммиттэр. Ол иһин олорор сирдэрэ олус ыраас. Бөҕү барытын кэриэтэ хос оҥорон таһаараллар. Оттон биһиэхэ хаһан оннук араарар буоларбыт биллибэт. Ол эрээри, саҥа саҕалааһыны өйүүр наадалаах. Тоҕо диэтэххэ, кэнники кэмҥэ пластик уонна салаппаан олус дэлэйдэ.
Күн аайы ыал биирдии-иккилии мөһөөччүк бөҕү таһааран тоҕор, онтугар үксэ биирдэ эрэ туттуллубут пластик уонна салаппаан буолар. Биллэрин курдук, пластик 500 сыл туох да буолбакка сытар, тулалыыр эйгэни киртитэр. Оттон уматтахха, салгыны киртитэр гааһы таһаарар, бу халлаан озоннаах хаттыгаһын алдьатар. Аан дойдуга 60-ча сыл иһигэр 8-9 миллиард туонна пластик оҥоһуллан тахсыбыт, ол билигин бөх буолан сытар. Итинтэн 9 эрэ бырыһыана хос оҥоһуллар.
Тулалыыр эйгэни харыстыыр сыалтан, бөҕү арааран, хос оҥорон таһаарар ньыма сыыйа киирэн иһэрэ буоллар.
Ангелина Васильева, “Саха сирэ” хаһыат, edersaas.ru