Бэс ыйын 5 күнэ – Аан дойдутааҕы тулалыыр эйгэни харыстааһын уонна РФ экологтарын күннэрэ.
Александр ТАРАСОВ, «Саха сирэ» хаһыат, edersaas.ru
СӨ Айылҕа харыстабылын министиэристибэтин, Дьокуускай куорат дьаһалтатын, Автодорожнай уокурук, ГИБДД управлениетын уонна СӨ бэлисипиэт спордун федерациятын көҕүлээһиннэринэн, бэс ыйын 4 күнүгэр бэлисипиэттээх субуотунньук буолуоҕа. Сарсыарда 10 чаастан Орджоникидзе болуоссаттан бэлисипиэттээхтэр холуонналара хоҥнон, Көтөр фабрикатын оройуонугар тиийэн, онно баар сир-уот бөҕүн-саҕын ыраастыахтара.
Анна Налимова, СӨ Айылҕа харыстабылын министиэристибэтин пресс-сулууспатын салайааччы:
– Бу тэрээһин сүрүн-сыала соруга бэлисипиэт экологияҕа хоромньута, буортута суоҕун, куттала суоҕун уонна доруобуйаҕа көдьүүстээҕин пропагандалааһын буолар. Бэс ыйын 5 күнэ – Аан дойдутааҕы тулалыыр эйгэни харыстааһын уонна РФ экологтарын күннэригэр айылҕаны харыстыыр санаалаах дьон бу анал тэрээһиҥҥэ көхтөөхтүк кыттыахтара диэн эрэнэбит. Онон Дьокуускай куорат олохтоохторун, ыалдьыттарын бэс ыйын 4 күнүгэр сарсыарда 10 чааска күүтэбит.