Сайтпытыгар бу дьыл кулун тутар 14 күнүгэр «Бэлисипиэттэри уоруу кэмэ саҕаланна» диэн уорууттан сэрэтэр ис хоһоонноох иһитиннэриибит бэчээттэммитэ.
Вера МАКАРОВА, «Саха сирэ» хаһыат, edersaas.ru
Ис дьыала уорганнара ити курдук сэрэтии үлэтин тиһигин быспакка ыыталлар эрээри, дьон син биир кулгааҕын таһынан истэн, бэйэтин тус малыгар дьалаҕайдык сыһыаннаһан, ытыһын соттон хаалара баар суол.
Ол курдук, киин куоракка өрөбүл түүн 01.00 чаас саҕана Крупская уулуссатыгар турар дьиэлэртэн биир киһи эрийэн, бэлисипиэтин уорбуттарын тыллаабыт. 10 тыһ. солк. сыаналаах «Форфард» диэн мааркалаах бэлисипиэтин подъезтан, үһүс этээстэн уоран илдьэ барбыттар.
Оттон бэҕэһээ киэһэ П.Алексеев аатынан уулуссаҕа турар дьиэттэн эмиэ итинник иһитиннэрии киирбит — подъезка турбут 10 тыһ. солк. сыаналаах бэлисипиэти күлүүстээх торуоһун алдьатан баран уорбуттар.
Итинэн сибээстээн, полиция маннык сүбэлэри биэрэр:
1). Бэлисипиэккин көрүүтэ суох хаалларыма. Сүрэҕэлдьээбэккэ-хайаабакка, хаһыс да этээс буоллун, подъезка буолбакка, кыбартыыраҕар киллэрэн туруор.
2). Оттон кылгас да кэмҥэ подъезка туруорарга күһэллэр буоллахха, эрэллээх, анал күлүүстээх торуоһунан туттар.
3). Маныаха бэлисипиэккин, туттарар сиргин төһө бөҕөтүн бэрэбиэркэлээн эрэ баран, хааллар.
4). Видеокамера баар сиригэр туруорарыҥ өссө эрэбил буолуо этэ.
5). Бэлисипиэккин билбэт киһигэр быстах да бириэмэҕэ туттарыма.
6). «Тимир атыҥ» туох уратылааҕын өйдүү сырыт (өҥө-дьүһүнэ, туох эмит суруга-ойуута, киэргэтиитэ). Оннук ураты бэлиэлэрэ суох буоллаҕына, бэйэҥ тугунан эмит, холобура, сотуллубат кыраасканан бэлиэтээ.
7). Маны таһынан, хас биирдии бэлисипиэт бэйэтэ нүөмэрдээх (арааматыгар). Ону бэлисипиэтиҥ пааспарыгар суруйан биэр.
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн.