Дьокуускайга Россия боксаҕа чемпионата буола турар. Өрөспүүбүлүкэ Ил Дархана аан тылыгар бокса Саха сиригэр дириҥ силистээх-мутуктаах диэн бэлиэтээтэ.
«Биһиги Сахабыт сириттэн Олимпиада, аан дойду, Европа, ССРС, Россия чемпионаттарын призердара бааллар. Бу рингэҕэ дойду күүстээхтэрэ биллиэхтэрэ. Итиэннэ 2020 сылга Токиоҕа Россия чиэһин көмүскүүр ааттар ааттаныахтара. Василий Егоров лиидэрдээх Саха сирин хомуур хамаандата чиэстээхтик кыттыаҕа дии саныыбын«, — диэтэ Айсен Николаев.
Чемпионат арыллыытын кэннэ, рингэҕэ тута Василий Егоров (49 кг.) Виктор Кулдошины (Москва) утары таҕыста. Туораттан көрөргө, улаханнык ыарырҕаппакка, Егоров утарсааччытын холкутук кыайда. Салгыы Тааттаттан тардыылаах Роман Обутов (75 кг) Вениамин Пряхинныын (Московскай уобалас) кииристэ. Манна саха уола хаҥастай буолан, утарсааччыта сатамньыта суох балаһыанньаҕа киирдэ, эбиитин хас да охсуу кэннэ хааһа хайа барда. Обутов кыайыыны ситистэ.
Оттон бүгүн 52 киилэҕэ Саха сирин хамаандатын саамай эдэр боксера, 18-таах Талбан Егоров Дагестантан Махач Юсуповы кыайда. Итиэннэ билиҥҥитэ үс кыайтарыы баар.
Игнат Сивцев (56 кг) Дамир Хикматулиҥҥа (Тюмень) кыайтарда. Дьулус Яковлев Расул Салиевка (ХМАО — Югра — Дагестан) иннин биэрдэ. Оттон Михаил Парников Россия икки төгүллээх чемпиона Бахтомар Назировы кыайан баһыйбата. Чемпионат салҕанар.
Николай Попов, «Саха сирэ», edersaas.ru