Дьокуускайга ыытылла турар Үтүө санаа сылыгар эдэр кэргэнниилэр үтүө үгэһи олохтоон, мас олортулар. От ыйын 15 күнүгэр Сайсары күөл кытылыгар, Ийэ скверигэр эдэр кэргэнниилэр аллеялара баар буолла.
Ханнык баҕарар үтүө саҕалааһын ким эрэ көҕүлээһиниттэн үөскүүр. Аллеяны олордор идиэйэ саҥа ыал буолар Владимир уонна Евгения Григорьевтарга үөскээбитин, куорат дьаһалтата, ЗАГС управлениета, “Арассыыйа ийэлэрэ” хамсааһын салаата өйөөбүттэрэ.
Аллея аһыллыытын өрөспүүбүлүкэҕэ ЗАГС тэриллибитэ 100, Саха сирэ Арассыыйа састаабыгар киирбитэ 385, САССР үөскээбитэ 95 уонна СӨ Конституциятын 25 сылларыгар анаатылар.
Акцияҕа саҥа ыал буолбут биэс паара кытынна. Кинилэр арыалдьыттарын, доҕотторун кытта кэлэн, сквер күөл диэки өттүгэр кэккэлэччи мас олортулар уонна салгыы көрөргө-истэргэ эбээһинэс ылыннылар. Саҥа олордуллубут мастары көрбөтөххө-харайбатахха, уу куппатахха, иинэн-хатан хаалаллара баар суол. Оттон эдэр кэргэнниилэр сыһыаннарын эмиэ харыстыах, бүөбэйдиэх тустаахтар.
Бу күн сыбаайбалыыр пааралар кэлэн маннык акцияҕа кыттыбыттара кэрэхсэбиллээх. Мээнэҕэ “маста олорт, дьиэтэ тут, оҕоҕун улаатыннар, оччоҕо олоххо сыалгын ситиэҥ” диэн эппэттэр эбээт. Инникитин да саҥа ыал буолар пааралар манна кэлэн мастары олордор үтүө үгэһи ылыныахтара, оччоҕо куораппыт өссө ордук киэркэйиэ, күөҕүнэн чэлгийиэ.
Ангелина ВАСИЛЬЕВА, “Саха сирэ” хаһыат, edersaas.ru
Хаартыска: Якутск.рф сайтан.