Дьокуускай куоракка кулун тутар 21-23 күннэригэр уопсастыбаннай-политическай деятель Исиидэр Бараахап төрөөбүтэ 120 сылыгар аналлааах киэҥ далааһыннаах тэрээһиннэр ыытылла тураллар.
edersaas.ru
Бүгүн ол чэрчитинэн, Национальнай библиотека историческэй саалатыгар историческэй наука дуоктара Никита Архипов «Үөһээ Бүлүү историята» кинигэтин сүрэхтэниитэ буолла. Бу кинигэ былырыын күн сирин көрбүтэ. Тэрээһиҥҥэ Үөһээ Бүлүү улууһун уопсастыбаннаһа, Дьокуускай куоракка олорор Үөһээ Бүлүүттэн төрүттээх дьон-сэргэ кытыннылар.
Тэрээһини философскай наука дуоктара Виктор Михайлов иилээн-саҕалаан ыытта. Кини: «Бу иннинээҕи маннык хабааннаах кинигэ күн сирин көрбүтэ ыраатта. Библиотекаларга эрэ булан көрүөххэ сөп. Биллииллээх философ Авксентий Егорович Мординов «Кэскиллээх норуот кэрэ дьоннорун кэриэстиир» диэн этиитэ дириҥ ис хоһоонноох. Ол эбэтэр Үөһээ Бүлүү улууһа бу кинигэни таһааран, былыргыттан саҕалаан билиҥҥитигэр тиийэ үйэтитин, кэлэр ыччакка анаан утары уунардаах буолбута улахан кэскиллээх дьыала», — диэн санаатын үллэһиннэ.
Салгыы Үөһээ Бүлүү улууһун баһылыга Владимир Поскачин: «Дьоһуннаах кинигэ күн сирин көрдө. Никита Деевич уон сыл устата дьаныһан туран суруйда. Улахан үлэни үмүрүттэ. Билигин кинигэ туһунан санааҕытын аһаҕастык этиҥ. Түгэнинэн туһанан, Дьокуускай куоракка биллиилээх политическэй деятель Исиидэр Бараахап төрөөбүтэ 120 сыллаах үбүлүөйүгэр аналлаах тэрээһиннэр ыытылла туралларынан барыгытын эҕэрдэлиибин!», — диэн эттэ.
Ярославскай аатынан мусуой дириэктэрэ Егор Шишигин:
— Бу кинигэни сэргээн, умсугуйан туран аахпытым. Бу суруйуу научнай таһыма олус үрдүк. Маннык научнай таһымнаах кинигэ атын улуустарга өссө тахса илик. Никита Деевич элбэх кинигэ ааптара буолар. Кини суруйууларын сэргээн ааҕабын. Ааспыт сайын үөһээ бүлүүлэр Манчаары оонньууларын үрдүк таһымнаахтык ыыппыттара. Бу кинигэҕэ Үөһээ Бүлүү улууһун сомоҕолоһуутун тыына баар. Түгэнинэн туһанан, табаарыспын Никита Деевиһы ис сүрэхпиттэн эҕэрдэлиибин, доруобуйаны баҕарабын!
Василий Илларионов, филологическэй наука дуоктара, профессор:
— Учууталым Никита Деевич кинигэтин олус сэргээн аахтым. Киһи элбэҕи сомсон ылар суруйуута. Бу манна анаан рецензия суруйбутум да «Кыым» да, «Саха сирэ» да хаһыаттар таһаара иликтэр, уһуна бэрт дииллэр. Арай, «Эдэр саас» сайтка таһаарбыттар быһыылаах. Учууталбын бу ураты кинигэни таһаарбытынан эҕэрдэлиибин!
Михаил Алексеев-Дапсы, филологическэй наука кандидата:
— Мин көрүүбэр, улуус устуоруйата бары өттүнэн бэркэ толкуйдаммыт, уу тэстибэтин курдук суруллубут, сиик охсубатын курдук дьиппиниччи ыпсарыллан хомуллубут. Ааптар Никита Деевич Үөһээ Бүлүү инньэ таас үйэтиттэн саҕалаан түҥ былыргытын, улуус сиригэр-уотугар сахалар олохсуйууларын, өбүгэбит үгэс буолбут култууратын барытын хабан суруйбут. Бу барыта науканан бигэргэнэр.
* * *
Никита Архипов тэрээһин түмүгэр: «Ис сүрэхпиттэн барыгытыгар махтанабын. Кинигэни уһуннук дьаныһан туран суруйдум. Кэлэн санааҕытын этэн барбыккытыгар улахан махтал. Бу кинигэ күн сирин көрүүтүгэр быһаччы көмөлөспүт улууспут баһылыга Владимир Поскачиҥҥа махтанабын», — диэтэ уонна доруобуйа баарын тухары өссө да суруйуоҕун туһунан эттэ.
Александр Тарасов, edersaas.ru сайтка анаан