Дьокуускайга Кулун Куллустуур туһунан олоҥхонон комикс оҥордулар

Бөлөххө киир:

Бу күннэргэ «Rum» анимационнай устуудьуйа аатырбыт олоҥхоһут Иннокентий Тимофеев-Теплоухов Куруубай хааннаах Кулун Куллустуурдиэн олоҥхотунан бастакы сахалыы манганы (дьоппуоннар комикстарын ньыматынан) оҥорон таһаарда.

Кинигэ Дьокуускай маҕаһыыннарыгар ахсынньы 9 күнүттэн атыыланыаҕа.

«Rum» анимационнай устуудьуйа дириэктэрэ Игорь Башарин этэринэн, манга олоҥхо кыра түһүмэҕин — сюжет сайдыытын саҕаланыытын, интириигэтин хабар. Итиэннэ тиэкискэ  саҥа персонаж эбиллэн биэрбит.

Бу үлэҕэ идэтийбит худуоһунньуктар уонна каадырдарынан анимация исписэлиистэрэ кыттыбыттар. Кинигэ 74 сирэйдээх, уопсайа 999 ахсаанынан бэчээттэммит.

Айар хамаанда маҥнай олоҥхону кичэйэн үөрэппит, Олоҥхо тыйаатырын испэктээктэрин көрбүт. ХИФУ Олоҥхо институтун кытта консультацияласпыт, сүбэ-ама ылбыт.

«Кулун Куллустуур» комикс кылаабынай худуоһунньуга Сардаана Егорова –Арктикатааҕы култуура уонна искусство институтун бүтэрбитэ, графическай дизайнер.

Оттон “Куруубай хааннаах Кулун Куллустуур” олоҥхону уруккута Боотуруускай, билиҥҥитэ Чурапчы улууһун Хайахсыт нэһилиэгиттэн төрүттээх саха биллиилээх олоҥхоһута Иннокентий Гурьевич Тимофеев-Теплоуховтан  1906 сыллаахха этнограф Виктор Васильев устан хаалларбыт.  Олоҥхо  1916 сыллаахха аан бастаан сахалыы тылынан бэчээккэ тахсыбыт.

Манга сүрэхтэниитэ ахсынньы 8 күнүгэр  «Россия – моя история» историческай пааркаҕа буолуоҕа.

+1
0
+1
0
+1
0
+1
0
+1
0
+1
0
+1
0