Дьокуускай куорат төрүттэммитэ 385 сылын чэрчитинэн, куорат дьаһалтатын уонна мүөттээх ыҥырыаны иитээччилэр Саха сиринээҕи кииннэрин тэрийиилэринэн, Орджоникидзе болуоссатыгар мүөт Бүтүн Россиятааҕы дьаарбаҥката саҕаланна.
Дьаарбаҥка биир ый устата үлэлиэҕэ, атырдьах ыйын 14 күнүгэр, Мүөттээх Спас бырааһынньыгар түмүктэниэҕэ. Быйылгы дьаарбаҥка ааспыт сыллардаах тэрээһинтэн уратытынан кыттааччыта лаппа элбэҕэ буолла. Ол курдук, олохтоох урбаанньыттары итиэннэ Дьокуускайдааҕы Епархия мүөтчүттэрин таһынан Россия киин уобаластарыттан, Башкирияттан, Хайалаах Алтайтан, Приморьяттан тиийэ кэлбиттэр. Инньэ гынан, манна мүөт араас суордун (сырдык араҕас, сибэккилээх, харастаах, малиналаах, гречкалаах уо.д.а.) итиэннэ перга, пыльца, сот, прополис курдук ыҥырыаттан ылыллар бородууксуйа эгэлгэтэ баар. Дьокуускай олохтооҕо, отучча сыл устата мүөттээх ыҥырыаҕа идэтийэн дьарыктанар Анатолий Гаевой дьоно бу да сырыыга араас мүөттэрэ элбэх.
Павел Иванов, Гаевой хаһаайыстыбатын бэрэстэбиитэлэ:
— Дьаарбаҥкаҕа бородууксуйабыт саҥа көрүҥүн, прополистаах положочканы аҕаллыбыт. Минньигэс, дыргыл сыттаах, доруобуйаны чэбдигирдэргэ олус көмөлөөх, ыалдьар сиргэ, холобур, сискэ, төбөҕө, күөмэйгэ… туттахха, ыарыыны төрүт ылан кэбиһэр.
Уһун, тымныы кыһыннаах, кылгас сайыннаах Саха сирэ хаптаҕас, моонньоҕон, сугун, уулаах отон, дьөлүһүөн, биэ эмиийэ уонна кучу курдук мүөттээх үүнээйинэн баай итиэннэ салгына ыраас, кураанах буолан, ыҥырыаны иитэргэ олус табыгастааҕын исписэлиистэр бэрт өртөн бэлиэтииллэр. Ол эрээри, ааспыт өттүгэр ыҥырыаны иитэн мүөтү сүүрдэргэ сүрүннээн атын омук дьоно, ону да биирдиилээн дьарыктанан кэлбиттэрэ. Табан дьаһайдахха, бу салаа барыстааҕын өйдөөннөр, улуус дьоно да мүөккэ ылсан эрэллэр. Хас да хаһаайыстыба Намҥа, Хаҥаласка бааллар. Бүлүүгэ үс хаһаайыстыба дьарыктанар. Олортон биирдэстэрэ, Дьөккөн нэһилиэгэр баар «Сиккиэр» бааһынай хаһаайыстыба мүөтүн улууска атыыга таһаарда! Онон кэлэр өттүгэр маннык дьаарбаҥкаларга көхтөөхтүк кыттаннар, экологическай өттүнэн ыраас, үрдүк хаачыстыбалаах саха мүөтэ баарын биллэриэхтэрэ диэн эрэниэҕиҥ.
Ыспыраапка
Мүөт минньигэс ас буоларын таһынан сылааны аһардар, ньиэрбэ күүркэйиитин уоскутар, тымныйыыттан эмтиир дьикти дьайыылаах.
Раиса СИБИРЯКОВА, “Саха сирэ” хаһыат, edersaas.ru
